नवी दिल्ली : जागतिक बाजारपेठेत टिकाव धरेल अशा किमान एका शेतीमालाचे राज्यांनी विपणन केले पाहिजे. अन्नप्रक्रिया उद्योगामध्ये प्रत्येक जिल्ह्याची काय क्षमता आहे, हे ओळखून त्यास बळ दिले पाहिजे. तरच जगाचे लक्ष आपल्याकडे आकर्षित होईल, असे प्रतिपादन पंतप्रधान नरेंद्र मोदी यांनी शुक्रवारी (ता. ३) केले.

पंतप्रधान मोदी यांनी शुक्रवारी वर्ल्ड फूड इंडिया २०१७ चे उद्घाटन केले. पंतप्रधान म्हणाले, की भारतात मोठी ग्राहक संख्या आहे. यामुळे अन्नसाखळीला (फूड चेन्स) चांगली संधी आहे. ग्रामीण भागातील उत्पन्नवाढीसाठीही अन्नप्रक्रिया उद्योग अतिशय महत्त्वपूर्ण ठरणार आहे. भारतीय अर्थव्यवस्था वेगाने घोडदौड करत आहे. वस्तू आणि सेवाकरामुळे करव्यवस्था अतिशय सोपी आणि सुटसुटीत झाली आहे. खाद्यपदार्थांच्या उत्पादनांमध्ये मोठ्या प्रमाणात वाढ झाली आहे. यासोबतच कररचना सोपी झाल्याने त्याचा फायदा उद्योगांना होत आहे. त्यामुळे जगातील वेगाने वाढणाऱ्या अर्थव्यवस्थांमध्ये भारताचा समावेश होतो. भारत एका मोठ्या क्रांतीसाठी तयार आहे. भारतात फूड चेन्सना चांगली संधी आहे. भारतात ग्राहकांची संख्यादेखील मोठी आहे. त्यामुळे फूड चेन्स यशस्वी होऊ शकतात

परकीय गुंतवणूक आकर्षित करण्याच्या उद्देशाने वर्ल्ड फूड इंडियाचे आयोजन करण्यात आले आहे. यामध्ये जगभरातील गुंतवणूकदारांसोबत प्रमुख कंपन्या सहभागी झाल्या आहेत. अन्नप्रक्रिया मंत्रालयाकडून याचे आयोजन करण्यात आले असून, तीन दिवस हा कार्यक्रम चालणार आहे. अन्नप्रक्रिया उद्योगाशी संबंधित अर्थव्यवस्थेत परिवर्तन घडवणे, परकी गुंतवणूकदारांना आकर्षित करणे, हे या कार्यक्रमाचे उद्दिष्ट आहे. याशिवाय शेतकऱ्यांचे उत्पन्न दुप्पट करणे हादेखील हेतू या कार्यक्रमामागे आहे.