सिल्लोड, जि. औरंगाबाद  : सिल्लोड-सोयगाव तालुक्यात पावसामुळे पिकांचे मोठे नुकसान झाले आहे. या खरीप पिकांच्या नुकसानीची पाहणी स्वाभिमानी शेतकरी संघटनेचे अध्यक्ष तथा माजी खासदार राजू शेट्टी यांनी मंगळवारी (ता. ५) केली.

तालुक्यातील भवन, मंगरूळ, हट्टी, मांडणा, गोळेगाव, सारोळा या परिसरातील शेतकऱ्यांच्या बांधावर जात श्री. शेट्टी यांनी पिकांची पाहणी करत शेतकऱ्यांशी संवाद साधला. या वेळी श्री. शेट्टी म्हणाले, की राज्यात काही महिन्यांपूर्वी कोल्हापूर, सांगलीमध्ये महापुरामुळे शेतकऱ्यांचे मोठे नुकसान झाले होते. त्या वेळी शासनाने महापुराची स्थिती पाहता शेतकऱ्यांना भरीव निधीची तरतूद करून नुकसानभरपाई दिली. आता हाच निकष ठेवून अतिवृष्टीमुळे झालेल्या नुकसानीची भरपाई शेतकऱ्यांना द्यावी.

मराठवाड्यात पावसामुळे तसेच सिल्लोड तालुक्यात अतिवृष्टीमुळे शेतीमालाचे संपूर्ण नुकसान झाले आहे. सरसकट पंचनामे करून शेतकऱ्यांना नुकसानभरपाई द्यावी. त्याचबरोबर पीकविमा कंपन्यांनीसुद्धा पीकविम्याची रक्कम देताना शेतकऱ्यांना वेठीस धरण्याचा प्रयत्न करू नये. या वेळी त्यांच्यासोबत जिल्हा परिषदेचे माजी अध्यक्ष रंगनाथ काळे, स्वाभिमानी शेतकरी संघटनेचे जिल्हाध्यक्ष मारोती वराडे, जिल्हा उपाध्यक्ष मुक्ताराम गव्हाणे, तालुकाध्यक्ष सुनील सनानसे उपस्थित होते.