वाशीम ः जिल्ह्यात काही भागात सततच्या पावसामुळे यंदाही खरिपातील पिकांना फटका बसला आहे. सोयाबीनच्या शेंगांमधून कोंब बाहेर आले आहेत. याचा उत्पादनावर व दर्जावर विपरीत परिणाम होणार आहे. भर जहॉंगीर परिसरात मूग, उडिदाप्रमाणे सोयाबीनला अंकुर आल्याने कृषी आणि महसूल विभागाने पाहणी करून सर्वेक्षण करण्याची मागणी युवासेना तालुका उपप्रमुख बळीराम चोपडे यांनी केली आहे.

मागील काही दिवसांपासून होत असलेल्या सततच्या पावसाने मूग, उडिदाचे नुकसान झाले. परंतु ही पिके शासनाच्या निकषामध्ये बसले नसल्यामुळे अनेक शेतकरी मदतीपासून वंचित आहेत. आता शेतकऱ्यांची मदार असलेल्या सोयाबीन पिकालाही पावसाचा फटका बसत आहे. शेतातील उभ्या हिरव्या सोयाबीन शेंगांमधून अंकुर दिसून येत आहे.

रिसोड तालुक्यातील भर जहाँगिर महसूल मंडळामध्ये अनेक शेतकऱ्यांच्या पिकात हा प्रकार दिसून येत आहे. भर जहाँगिर येथील बळीराम चोपडे यांच्या शेतातील सुमारे सहा एकर शेतातील सोयाबीन पिकात हिरव्या शेंगांमधून अंकुर बाहेर आले आहेत. असाच प्रकार इतर शेतकऱ्यांबाबतही होत आहे. सोयाबीन पीक हातचे जाणार असल्याची त्यांच्यात चिंता वाढली आहे.

सततच्या पावसामुळे यंदाही सोयाबीनच्या उत्पादनात घटीची चिन्हे आहेत. त्यातच शेंगांना कोंब फुटल्याने उत्पादनाचा दर्जा घटणार आहे. संबंधित विभागांनी तत्काळ सर्वेक्षण करावे - बळीराम चोपडे, उपतालुका, रिसोड