परभणी : परभणी, नांदेड, हिंगोली जिल्ह्यात गेल्या दोन दिवसांपासून पाऊस सुरु आहे. त्यामुळे शासकीय केंद्रावर कापूस खरेदीसाठी अडथळे येते आहेत. मोजमाप न झालेली वाहने केंद्राबाहेर तसेच मार्केट यार्डात उभी असल्यामुळे पावसात कापूस भिजून शेतकऱ्यांचे नुकसान होत आहे. या तीन जिल्ह्यांतील ५० हजारांहून अधिक नोंदणीकृत शेतकऱ्यांच्या कापसाची खरेदी बाकी आहे. त्यामुळे अडचणी वाढल्या आहेत. 

परभणी जिल्ह्यात ऑनलाइन आणि ऑफलान नोंदणीकृत ४१ हजार २१ शेतकऱ्यांपैकी मंगळवार (ता.२) पर्यंत पणन महासंघाच्या ४ केंद्रावर ५ हजार ४३८ शेतकऱ्यांचा १ लाख ७४ हजार ७८८ क्विंटल आणि सीसीआयच्या ६ केंद्रांवर ५ हजार २९७ शेतकऱ्यांचा १ लाख ४४ हजार ५४६ क्विंटल कापूस खरेदी करण्यात आला. अजून ३० हजार ४८६ शेतकऱ्यांच्या कापसाची खरेदी बाकी आहे. 

सोमवारी (ता.१) एसएमएस केल्यामुळे अनेक केंद्रावर शेतकऱ्यांनी कापूस विक्रीसाठी आणला. परंतु, मंगळवारी (ता.२) दुपारनंतर पाऊस आल्यामुळे खरेदी थांबवावी लागली. त्यामुळे केंद्रावर तसेच मार्केट यार्डात बुधवारी (ता.३) दुपारपर्यंत वाहने उभी होती. भाड्याचा भुर्दंड तसेच पावसात भिजल्यामुळे शेतकऱ्यांचे नुकसान झाले. 

नांदेड जिल्ह्यातील ८ केंद्रांवर मंगळवार (ता.१) पर्यंत ७ हजार ५६ शेतकऱ्यांचा १ लाख ४२ हजार ७५८ क्विंटल कापूस खरेदी करण्यात आला. अजून २१ हजार १०३ शेतकऱ्यांच्या कापसाची खरेदी शिल्लक आहे. हिंगोली जिल्ह्यात दोन केंद्रांवर ९४१ शेतकऱ्यांचा १९ हजार ७०९ क्विंटल कापूस खरेदी करण्यात आला. तर, ९०० हून अधिक शेतकऱ्यांच्या कापसाची खरेदी बाकी आहे. सीसीआय आणि पणन महासंघाने पावसामुळे खरेदी बंद करत असल्याच्या सूचना दिल्या आहेत. त्यामुळे मोजमाप शिल्लक राहिलेल्या शेतकऱ्यांच्या अडचणी वाढल्या आहेत.