पुणे : जवळपास आठवडाभर उघडीप दिल्यानंतर राज्यात मॉन्सून पुन्हा सक्रिय होण्यास पोषक स्थिती आहे. गुरुवारपासून (ता. १८) राज्यात सर्वदूर पाऊस सुरू होण्याची शक्यता आहे. आज (ता. १७) कोकणात काही ठिकाणी मुसळधार पावसाचा, तर उर्वरित राज्यात ढगाळ हवामानासह हलक्या पावसाचा अंदाज हवामान विभागाने वर्तविला आहे.  मॉन्सूनचा आस असलेला कमी दाबाचा पट्टा राजस्थानपासून बंगालच्या उपसागरापर्यंत सक्रिय होता. हा पट्टा दक्षिणेकडे सरकल्याने दोन दिवसांत मॉन्सून सक्रिय होण्याची शक्यता आहे. यातच म्यानमारच्या किनाऱ्यालगत समुद्रसपाटीपासून ५.८ किलोमीटर उंचीवर चक्राकार वारे वाहत असून, बंगालच्या उपसागरात कमी दाबाचे क्षेत्र तयार होण्याचे संकेत आहेत. ही स्थिती पोषक ठरल्याने राज्यात गुरुवारपासून पाऊस सुरू होण्याचा अंदाज आहे. कोकण आणि घटमाथ्यावर तुरळक ठिकाणी मध्यम ते जोरदार सरी येत आहेत. मराठवाडा, विदर्भात पावसाची उघडीप कायम आहे. शुक्रवारपासून विदर्भात पाऊस वाढणार असून, मराठवाड्यातही पाऊस पडण्यास पोषक स्थिती निर्माण होत आहे.   मंगळवारी (ता. १६) सकाळपर्यंतच्या २४ तासांमध्ये राज्यात विविध ठिकाणी पडलेला पाऊस मिलिमीटरमध्ये (स्रोत - हवामान विभाग) : कोकण : चिपळूण ११०, संगमेश्वर १००, पोलादपूर, वैभववाडी प्रत्येकी ९०, राजापूर ८०, रत्नागिरी, लांजा प्रत्येकी ७०, वेंगुर्ला, गुहागर, कणकवली, खेड प्रत्येकी ५०, दोडामार्ग, श्रीवर्धन, मुरूड, सावंतवाडी प्रत्येकी ४०, देवगड ३०.  मध्य महाराष्ट्र : गगणबावडा ८०, महाबळेश्वर, राधानगरी प्रत्येकी ४०, पाटण, पन्हाळा प्रत्येकी २०.  घाटमाथा : कोयना नवजा १००, शिरगाव, कोयना पाफळी प्रत्येकी ६०, दावडी ५०, आंबोणे ४०.