परभणी : जिल्ह्यात यंदाच्या रब्बी हंगामात मंगळवार (ता. १३) पर्यंत एकूण ५६ हजार २४३ हेक्टरवर (२०.२८ टक्के) पेरणी झाली आहे. यामध्ये रब्बी ज्वारीची ३४ हजार ३९२ हेक्टर आणि हरभऱ्याची १८ हजार २३३ हेक्टर पेरणी झाली असल्याची माहिती कृषी विभागाच्या सूत्रांनी दिली.

जिल्ह्यात यंदाच्या पावसाळ्यात झालेल्या कमी पावसामुळे रब्‍बी पिकांच्या पेरणीसाठी जमिनीत ओलावा नाही. त्यामुळे कोरडवाहू क्षेत्रातील पेरणी ठप्प झाली आहे. ओलितांची सोय असलेले शेतकरी पेरणी करत असल्यामुळे रब्बी पिकांच्या पेरणी क्षेत्रात हळूहळू वाढ होत आहे.

परभणी जिल्ह्यात रब्बीचे सरासरी क्षेत्र २ लाख ७७ हजार ३६७ हेक्टर आहे. पेरणी क्षेत्रामध्ये ज्वारीशिवाय गहू २ हजार ६७२ हेक्टर (८.७७ टक्के), हरभरा १८ हजार २३३ हेक्टर (३४.२३ टक्के), करडई ८९२ हेक्टर (३.५४ टक्के) या प्रमुख पिकांचा समावेश आहे. दुष्काळामुळे जिल्ह्यातील सर्वच तालुक्यांतील रब्बी पिकांचे क्षेत्र कमी झाले आहे. परंतु पालम आणि सोनपेठ तालुक्यांत पेरणी होऊ न शकल्याने सरासरी क्षेत्राच्या तुलनेत सर्वाधिक क्षेत्र नापेर राहिले आहे.

जिल्ह्यातील तालुकानिहाय पेरणी क्षेत्र