नांदेड ः नांदेड, परभणी, हिंगोली जिल्ह्यातील अनेक तालुक्यात सोमवारी (ता. ३०) सकाळी आठपर्यंतच्या २४ तासांमध्ये हलका ते मध्यम पाऊस झाला. काही भागात जोराच्या वाऱ्यासह पाऊस झाला. त्यामुळे शेतामध्ये काढणी सुरू असलेली रब्बी पिके तसेच हळदीचे भिजून नुकसान झाले.

नांदेड जिल्ह्यातील माहूर तालुक्यातील माहूर मंडळात ५ मिमी, वाई मंडळात २ मिमी, वानोळा मंडळात १० मिमी, सिंदखेड मंडळात ३ मिमी पाऊस झाला. किनवट तालुक्यातील दहेली मंडळात १२ मिमी पाऊस झाला. अन्य तालुक्यातील काही मंडळांमध्ये हलका पाऊस झाला.

परभणी जिल्ह्यातील परभणी तसेच परिसर, हिंगोली जिल्ह्यातील औंढानागनाथ तसेच वसमत तालुक्यात काही ठिकाणी वाऱ्यासह पाऊस झाला. या जिल्ह्यांमध्ये रब्बीची सुगी सुरू आहे. तसेच हळद काढणी हंगाम सुरू झाला आहे. पावसामध्ये गहू, ज्वारी, हरभरा तसेच हळद भिजल्याने शेतकऱ्यांचे नुकसान होत आहे. अधून मधून अवकाळी पाऊस सुरुच असल्यामुळे शेतामध्ये काढणी केलेला शेतमाल झाकून ठेवण्यासाठी शेतकऱ्यांची तारांबळ उडत आहे.