नांदेड ः  राज्‍य शासनाच्‍या पाणीपुरवठा व स्‍वच्‍छता विभागाच्‍या वतीने जलस्‍वराज्‍य टप्‍पा दोनअंतर्गत जिल्‍ह्यातील गावात प्रबोधन करण्‍यासाठी एलईडी व्‍हॅन पाठविण्‍यात आल्‍याअसून जिल्‍ह्यातील १४० गावांमध्ये एलईडी व्हॅनव्‍दारे पाणी व स्‍वच्‍छताविषयक माहितीपट, लघू चित्रपट दाखविले जाणार आहेत. या माहिती व संवाद उपक्रमात सर्वांनी सहभागी व्‍हावे, असे आवाहन जिल्‍हा परिषदेचे मुख्‍य कार्यकारी अधिकारी अशोक काकडे यांनी केले आहे.

शुक्रवारी (ता. ९) जिल्‍हा परिषद प्रांगणात मुख्‍य कार्यकारी अधिकारी अशोक काकडे यांच्‍या हस्‍ते हिरवी झेंडी दाखवून या व्हॅनचे उद्‌घाटन करण्‍यात आले. या वेळी अतिरिक्‍त मुख्‍य कार्यकारी अधिकारी शरद कुलकर्णी, उपमुख्‍य कार्यकारी अधिकारी डी. यू. इंगोले, पाणी व स्‍वच्‍छता सहाय्य संस्‍थेचे विभागीय समन्‍वयक अरुण रसाळ यांची उपस्थिती होती.

श्री. काकडे पुढे म्‍हणाले, ‘‘या मोहिमेत गावातील सर्व कुटुंब, शालेय विद्यार्थी, महिला बचतगट, गावस्‍तरावरील सर्व यंत्रणेला यात सहभागी करून घ्‍यावे. या वेळी जिल्‍हा पाणी व स्‍वच्‍छता मिशन कक्षाचे लेखाधिकारी एल. ए. हिरवे, अधीक्षक अल्‍केश शिरशेटवाड, मिलिंद व्‍यवहारे, विशाल कदम, नंदलाल लोकडे आदींची उपस्थिती होती.

नांदेड तालुक्‍यातील १२ गावांतून तर बिलोली मधील ११, भोकरमधील ९, मुदखेड- १०, हिमायतनगर मधील ९, अर्धापूर मधील १०, माहूर मधील ९, उमरी मधील ९, धर्माबाद मधील ९, मुखेड मधील ९, हदगाव मधील १०, कंधार मधील ९, किनवट मधील ११, लोहा मधील १०, देगलूर मधील १०, नायगाव तालुक्‍यातील १० गावांचा समावेश आहे. 

या एलईडी व्‍हॅनव्‍दारे शौचालय बांधकाम तंत्र, गावातील स्‍वच्‍छता, घनकचरा व सांडपाणी व्‍यवस्‍थापन, शालेय स्‍वच्‍छता, पाणी शुद्धीकरण, शाश्‍वत स्‍वच्‍छता, मासिक पाळी व्‍यवस्‍थापन, आरोग्‍य आदी विषयांवरील माहितीपटाव्दारे जनजागृती केली जाणार आहे.