अकोला   ः उत्पादनवाढीचे कारण देत खासगी दूध डेअरींकडून दरात कपातीची शक्यता उत्पादकांकडून व्यक्त होऊ लागली अाहे.  जळगाव जिल्ह्यातील एका डेअरीने काही दिवसांपूर्वी एक रुपयाने दूध खरेदीदर कमी केला होता. अाता पुन्हा अाठवडाभरात दर कमी करण्याची चर्चा असल्याचे उत्पादकांकडून सांगितले जात अाहे.

वऱ्हाडात दुग्ध व्यवसाय फारसा वाढलेला नाही. जो काही अाहे त्यात असंख्य अडचणी निर्माण झालेल्या अाहेत. शासकीय दूध संकलनाची सुविधा जेमतेम असल्याने सर्व भार खासगी डेअरींवर अवलंबून अाहे. सध्या अकोला येथील शासकीय केंद्रावर अकोला, बुलडाणा जिल्ह्यांतील मिळून ७७०० लिटर दूध संकलन होत अाहे. या दुधाच्या कितीतरीपट दूध खासगी डेअरींकडून संकलित केले जाते.  जळगाव जिल्ह्यातील खासगी डेअरी या भागात संकलनात अाघाडीवर अाहेत.

बुलडाणा जिल्ह्यात मदर डेअरीकडूनही दूध संकलन होत अाहे. मदर डेअरीकडून सध्या गायीच्या दूधाला ३.५ फॅट व ८.५ एसएनएफसाठी २५ रुपये लिटर असा दर दिला जात अाहे. त्यानंतर पुढील प्रत्येक पॉइंटला २० पैसे अधिक वाढत जातात. दुसऱ्या एका खासगी डेअरीने दर मात्र गेल्या काळात १ रुपयाने गायीच्या दुधाचा दर कमी केला अाहे. अाजवर २७ रुपये मिळत असलेला दर अाता २६ रुपये प्रतिलिटर मिळत आहे. येत्या काळात हा दर अाणखी कमी होण्याची शक्यता वर्तविण्यात येत अाहे.

डेअरींकडून शासनाने जाहीर केलेल्या फॅट व एसएनएफप्रमाणे दर दिले जात अाहेत. मात्र या भागात शासकीय खरेदीला मर्यादा असल्याने दूध उत्पादकांना संपुर्णपणे खासगी डेअरींवर अवलंबून राहावे लागत अाहे. या डेअरींकडून त्यांच्या धोरणानुसार दर दिले जातात. यावर कुणाचेही नियंत्रण नसल्याची वस्तुस्थिती अाहे.

सध्या अाम्हाला मदर डेअरीकडून चांगले दर दिले जात अाहेत. गायीचे दूध फॅट ३.५ अाणि एसएनएफ ८.५ साठी २५ रुपये दराने खरेदी केले जात आहे. त्यानंतर वाढणाऱ्या प्रत्येक पॉइंटसाठी २० पैशांनी दर वाढतो. अद्याप तरी दर कमी झालेले नाहीत, असे आडविहिर (जि. बुलडाणा) येथील  अमोल खर्चे यांनी सांगितले.

असे अाहेत शासनाचे दर