रावेर, जि. जळगाव ः तापी व पूर्णा नदीच्या पुरामुळे तापी नदीवरील मुक्ताईनगरनजीकच्या हतनूर धरणाचे बॅकवाटर रावेर (जि. जळगाव) तालुक्‍यातील नऊ गावांमधील शिवारात घुसल्यामुळे केळी, कापूस, पेरू या पिकांचे सुमारे साडेपाच कोटी रुपयांचे नुकसान झाल्याचा प्राथमिक अहवाल गुरुवारी (ता. ८) वरिष्ठांना सादर करण्यात आला. पंचनामे आणखी सुरूच असून, अंतिम अहवाल पंचनामे १०० टक्के आटोपल्यानंतर सादर होईल. यातच सततच्या पावसामुळे पंचनाम्यात अडथळा निर्माण होत आहे.  तापी व पूर्णा नदीला आलेल्या पुरामुळे हतनूर धरणाचे बॅक वॉटर शेती शिवारात घुसल्यामुळे विशेष करून केळी, कापूस व पेरू या पिकाचे नुकसान झाले होते. जेथे शेत जमीन संपादित झाली आहे. नुकसानीचे पंचनामे होत नव्हते. मात्र, संपादित जमिनीतील पिकांचेही बॅकवाटरने नुकसान झाले होते. संपादित न केलेल्या जमिनीतील पिकांच्या नुकसानीचे पंचनाम्यांना दोन दिवसांपूर्वी सुरवात झाली आहे. तालुक्‍यात ऐनपूर, विटवा, निंबोल, सांगवे, थेरोळा, निंभोरासिम, पातोंडी, खिरवड, नेहेते या नऊ गावांतील केळी, कापूस व पेरू आदी पिकांचे १९६  हेक्‍टर क्षेत्रातील पिकांचे सुमारे पाच कोटी ६३ लाख रुपयांचे नुकसान झाल्याचा प्राथमिक अहवाल कृषी व महसूल विभागातर्फे वरिष्ठांना सादर केला. वस्तुनिष्ठ पंचनामे सुरूच असून, नुकसानीचा आकडा वाढण्याची शक्‍यता आहे.