नाशिक: सोशल मीडियावरील ‘कोरोना’विषयक अफवांमुळे राज्यातील पोल्ट्री उद्योग मोठ्या आर्थिक कोंडीत सापडला आहे. या पार्श्वभूमीवर महाराष्ट्र पोल्ट्री फार्मर्स व ब्रीडर्स असोसिएशनच्या शिष्टमंडळाने नुकतीच मुंबई येथे राष्ट्रवादीचे अध्यक्ष शरद पवार यांची भेट घेतली. या वेळी श्री. पवार यांनी पोल्ट्री व्यावसायिकांच्या अडचणी जाणून घेतल्या. याप्रश्नी श्री. पवार पुढील आठवड्यात केंद्रीय अर्थमंत्री निर्मला सीतारामन यांची असोसिएशनच्या शिष्टमंडळाशी भेट घडवून आणणार आहेत, अशी माहिती असोसिएशनचे सचिव उद्धव अहिरे यांनी दिली.  यशवंतराव चव्हाण प्रतिष्ठानमध्ये नुकतीच पशुसंवर्धन मंत्री सुनील केदार, आमदार रोहित पवार तसेच श्री. पवार यांची असोसिएशनच्या पदाधिकाऱ्यांनी भेट घेऊन समस्यांबाबत चर्चा केली. २००६ मध्ये बर्ड फ्लूने मोठे थैमान घातले होते. त्या वेळी तत्कालीन केंद्रीय कृषिमंत्री शरद पवार यांच्या मध्यस्थीतून केंद्र व राज्य सरकारने मदत दिली होती. अशाच मदतीची आता अपेक्षा आहे. बर्ड फ्लूच्या धर्तीवर पोल्ट्री व्यावसायिकांना मदत करण्यासाठी समिती स्थापन करावी, पोल्ट्री व्यावसायिकांवरील आपत्ती ही राष्ट्रीय असल्याने अनुदानातील भार उचलावा, अशी विनंती या वेळी करण्यात आली. या वेळी असोसिएशनचे अध्यक्ष सी.वसंतकुमार, उपाध्यक्ष श्रीकृष्ण गांगुर्डे, राजेंद्र थोरात, नबाजी काळभोर, पांडुरंग सांडभोर, डॉ. प्रसन्न पेडगावकर, श्‍याम भगत आदी चर्चेत सहभागी झाले होते. प्रमुख मागण्या