अहमदाबाद, गुजरात  ः गुजरातमधील विधानसभा निवडणुकीच्या दुसऱ्या टप्प्यातील प्रचाराच्या अखेरच्या दिवशी मंगळवारी (ता.१२) कॉंग्रेसचे अध्यक्ष राहुल गांधी यांनी अहमदाबादमधील श्री जगन्नाथ मंदिरात जाऊन पूजा केली. त्यानंतर त्यांनी घेतलेल्या पत्रकार परिषदेत पंतप्रधान मोदी यांच्यावर जोरदार टीका केली.

‘‘गुजरातमधील लोक अतिशय बुद्धिमान अाहेत. पंतप्रधान मोदी प्रचारदौऱ्यात भ्रष्टाचार अथवा शेतकऱ्यांबाबत बोलत नाहीत, हे गुजरातमधील लोकांनी पहावे,’’ असे राहुल गांधी यांनी म्हटले अाहे. ‘‘मी जेव्हा मंदिरात जातो; तेव्हा मी गुजरातमधील लोकांच्या उज्ज्वल भविष्यासाठी तसेच येथे चांगला विकास व्हावा, यासाठी प्रार्थना करतो. मी मंदिरात जाणे चुकीचे अाहे’’, असा प्रश्न त्यांनी उपस्थित केला अाहे. अाम्ही गुजरातमधील निवडणूक जिंकू, असा विश्वासही त्यांनी या वेळी व्यक्त केला.

मोदी यांच्या सरकारने नोटाबंदी, जीएसटी असे एकामागून एक निर्णय घेत जनतेला धक्के दिले. भाजप सरकारने केवळ उद्योगपतींचे कर्ज माफ केले, अशी टीका त्यांनी केली. कॉंग्रेस सत्तेत अाल्यास चांगल्या अारोग्य सेवा पुरवू, असे अाश्वासन त्यांनी दिले.