वाशीम : वाढत्या कोरोनाचा संसर्ग रोखण्यासाठी प्रतिबंधात्मक उपाययोजना म्हणून जिल्ह्यात १ मेपर्यंत संचारबंदी लागू करण्यात आली आहे. या बाबतच्या सुधारित मार्गदर्शक सूचना २२ एप्रिल रोजी निर्गमित करण्यात आल्या होत्या. सदर मार्गदर्शक सूचनांमध्ये अंशतः बदल करून जिल्ह्यातील महाबीज, शेतकरी उत्पादक कंपनी व कृषी विज्ञान मंडळाची बीज प्रक्रिया केंद्र सुरू ठेवण्यास मुभा देण्यात आली आहे. तसेच दूध संकलन व विक्री करिता सकाळी ७ ते ११ वाजेपर्यंत आणि सायंकाळी ५ ते ७ वाजेपर्यंत मुभा देण्यात आली आहे. 

जिल्हा आपत्ती व्यवस्थापन प्राधिकरणाचे अध्यक्ष तथा जिल्हाधिकारी षण्मुगराजन एस. यांनी या बाबत सुधारित आदेश काढले. शेतकऱ्यांना येत्या खरीप हंगामात बियाण्यांचा पुरवठा सुरळीत होण्यासाठी जिल्ह्यातील महाबीज, शेतकरी उत्पादक कंपनी व कृषी विज्ञान मंडळाची बीज प्रक्रिया केंद्रे सुरू ठेवण्यास या आदेशानुसार मुभा देण्यात आली आहे. सदर बीज प्रकिया केंद्रांमध्ये कोरोना सुरक्षा नियमांचे पालन करणे आवश्यक आहे. तसेच अधिकारी, कर्मचाऱ्यांना संबंधित कार्यालयांनी ओळखपत्र प्रदान करावे. अधिकारी, कर्मचाऱ्यांनी सदर ओळखपत्र सोबत ठेवणे बंधनकारक राहील. 

दूध संकलन-विक्रीच्या वेळेत बदल  जिल्ह्यात दूध संकलन व विक्रीसाठी सकाळी ७ ते ११ वाजेपर्यंत आणि सायंकाळी ५ ते ७ वाजेपर्यंत मुभा देण्यात आली आहे. दूध व्यावसायिक दूध वितरणासाठी सकाळी ७ पूर्वी शहरामध्ये येऊ शकतील. तसेच सायंकाळी ७ वाजेनंतर घरी जाऊ शकतील. मात्र, त्यांच्याकडे दुधाचा कॅन सोबत असणे आवश्यक करण्यात आले आहे.