नगर  : पशुधनासाठी सुविधा पुरविताना छावणी चालकांचा दैनंदिन खर्च मोठा आहे. अनुदानाची रक्कम वेळेवर मिळाल्यास चालकांचे अर्थचक्र कोलमडणार नाही. पशुधनाला योग्य सुविधा मिळतील, यासाठी चालकांच्या १५ एप्रिल ते ३१ मेअखेरपर्यंतच्या अनुदानासाठी १३० कोटी रुपयांच्या मागणीचा प्रस्ताव तयार झाला आहे. लवकरच तो सरकारकडे सादर केला जाणार आहे. 

जिल्ह्यावर दुष्काळाचे सावट आहे. जनावरे जगविण्यासाठी जिल्ह्यात ५०३ चारा छावण्या सुरू आहेत. जिल्हाधिकारी राहुल द्विवेदी यांनी भाळवणी (ता. पारनेर) येथे १९ फेब्रुवारी रोजी पहिली चाराछावणी मंजूर केली. छावण्या सुरू होऊन शंभर दिवस पूर्ण झाले. जिल्हाधिकाऱ्यांनी आजअखेर जिल्ह्यात ५११ छावण्यांना मंजुरी दिली. त्यांपैकी ५०३ छावण्या सुरू आहेत. जामखेड, कर्जत, श्रीगोंदे, पारनेर, नगर, पाथर्डी, शेवगाव, संगमनेर, राहाता या तालुक्‍यांत छावण्यांना मंजुरी देण्यात आली आहे. 

छावणी चालविण्यासाठी होणारा खर्च मोठा आहे. छावणीच्या अनुदानासाठी प्रशासनाने सरकारकडे पाठपुरावा केला. त्यामुळे ५ मे रोजी ४६ कोटी ८१ लाख रुपयांचा पहिला निधी प्राप्त झाला. चालकांच्या खात्यांवर २७ फेब्रुवारी ते १५ एप्रिलदरम्यानची ५० टक्के रक्कम जमा करण्याचे काम प्रशासनाकडून सुरू आहे. लहान जनावरांसाठी प्रतिदिन ३५, तर मोठ्या जनावरांसाठी ७० रुपये अनुदान निश्‍चित केले होते. वाढता खर्च लक्षात घेऊन एप्रिलमध्ये ४५-९० आणि मे महिन्यात ५०-१०० असे जनावरांसाठीचे अनुदान दर निश्‍चित करण्यात आले. बदलत्या दराचा हिशेब करून छावणीचालकांना अनुदान मिळणार आहे.