धुळे ः पपईच्या दराचा तिढा निर्माण झाल्याने धुळे व नंदुरबार जिल्ह्यांतील पपईची तोडणी किंवा काढणी शेतकऱ्यांनी बंद ठेवली आहे. जोपर्यंत व्यापारी आठ रुपये प्रतिकिलोचा दर देणार नाहीत, तोपर्यंत शेतातून पपईची तोडणी होऊ देणार नाही, असा पवित्रा शेतकऱ्यांनी घेतला आहे.  धुळे व नंदुरबार जिल्ह्यात पपईची तापी काठावरील गावांमध्ये लागवड अधिक आहे. धुळे जिल्ह्यातील शिरपूर तालुक्‍यात तऱ्हाडी, निमझरी, बलकुवे, अर्थे आदी भागात पपईची लागवड अधिक आहे. नंदुरबार जिल्ह्यात शहादा तालुक्‍यातील मनरद, नांदरखेडा, प्रकाशा, वडछील, म्हसावद, जयनगर, मोहिदे आदी भागात पपई लागवड आहे. नंदुरबार तालुक्‍यातील समशेरपूर, शिंदे, लहान शहादे, पिंपळोद भागात लागवड आहे. मागील महिनाभरापासून पपई दरांचा तिढा या भागात आहे. व्यापारी शहादा व शिरपूर बाजार समितीला जुमानत नसल्याच्या तक्रारी शेतकऱ्यांनी केल्या आहेत. शेतकऱ्यांना शेतातच किंवा जागेवरच आठ रुपये प्रतिकिलो दर हवा आहे. व्यापारी पाच रुपये ५५ पैसे प्रतिकिलो, असा दर पपईला देत आहेत. व्यापारी जो दर देत आहेत, तो शेतकऱ्यांना मान्य नाही, अशी माहिती शेतकऱ्यांनी दिली.