पुणे   ः जून महिन्यातील दुसऱ्या आठवड्यात पडलेल्या पावसाच्या खंडाचा परिणाम भात पिकाच्या पुनर्लागवडीवर झाला आहे. जिल्ह्यात भाताचे सरासरी क्षेत्र ७२ हजार ९५३ हेक्‍टर असून, त्यापैकी आतापर्यंत अवघ्या ६ हजार ७८२ हेक्‍टर म्हणजेच सरासरी नऊ टक्के क्षेत्रावर भात लागवड झाली आहे. गेल्या वर्षी याच कालावधीत १६ हजार ३३४ हेक्‍टरवर म्हणजेच २२ टक्के क्षेत्रावर भात लागवड झाली होती. गेल्या वर्षीच्या तुलनेत यंदा आतापर्यंत भात लागवडीखालील क्षेत्र १३ टक्‍क्‍यांनी घटले आहे, अशी माहिती कृषी विभागाच्या सूत्रांनी दिली.

चालू वर्षी हवामान विभागाने चांगल्या पावसाचा अंदाज वर्तविला होता. भात उत्पादक शेतकऱ्यांनी आर्थिक परिस्थिती नसताना पीककर्ज घेऊन खरिपाची तयारी केली होती. अनेकांनी खते, बियाणांची खरेदी केली. परंतु जून महिन्याच्या पहिल्या आठवड्यात पुरंदर, बारामती वगळता उर्वरित भागात कुठेही पाऊस पडला नाही. दुसऱ्या व तिसऱ्या आठवड्यात पावसाचा चांगलाच खंड होता. त्यामुळे खरिपातील भात लागवड वेळेवर होऊ शकली नाही.

जून महिन्यातील चौथ्या आठवड्यात पावसाने काही प्रमाणात बरसण्यास सुरवात केली. त्यामुळे भात उत्पादकांना दिलासा मिळत लागवडीस सुरवात झाली होती.गेल्या दहा ते बारा दिवसांपासून  मावळ, मुळशी, भोर, वेल्हा, हवेली, खेड, जुन्नर आणि आंबेगाव या तालुक्‍यांत पावसाने चांगली हजेरी लावली आहे. यामुळे भात लागवडी वेगाने सुरू झाल्या आहे.