आजरा, जि. कोल्हापूर ः आजरा तालुक्‍यात भात कापणीस सुरवात झाली आहे. पूर्व भाग व उत्तूर परिसरात हावळ्या भाताची कापणी सुरू झाली आहे. त्याचबरोबर सोयाबीन व भुईमुगाची काढणी सुरू झाली आहे. शेतकरी कुटुंबे भात कापणी व मळणीच्या कामात व्यस्त झाली आहेत. पावसाचाही व्यत्यय येत असल्याने शेतकऱ्यांची धांदल उडाली आहे.

आजरा तालुक्‍यात सप्टेंबर महिन्यापासून खरीप पिकांच्या काढणीला सुरवात होते. या काळात हाळवी भातांची कापणी, सोयाबीन व भुईमुगाची काढणी सुरू होते. आठ दिवसांपासून सोयाबीन काढणीच्या कामाला सुरवात झाली आहे. उत्तूर व पूर्व भागात सोयाबीन काढणी जोरात सुरू आहे. उत्तूर परिसरात व पूर्व भागात भाताचे हाळवी पिक घेतले जाते. हाळवी भात कापणीला सुरवात झाली आहे. 

पावसामुळे शेतात दलदल तयार झाल्याने भाताची मळणी काढणे अडचणीचे बनले आहे. त्यामुळे लोखंडी लाकडी बाजल्यावर भाताची पेंडी झोडपून त्याच बरोबर पायाने तुडवून पारंपरिक पध्दतीने मळणी काढली जात आहे. काही ठिकाणी मळणी मशीनचा वापर केला जात आहे. काही गावात भुईमुगाची काढणी सुरू झाली आहे. 

दरम्यान, तालुक्‍यात पावसाळी वातावरण कायम आहे. पावसाच्या अधेमधे सरी कोसळत असल्याने कापणी, मळणी व काढणीच्या कामात व्यत्यय येत आहे. त्यामुळे शेतकऱ्याची चांगली धांदल उडाली आहे. शेतकरी कुटुंबांनी शेतात तळ ठोकला आहे. दरम्यान, सोयाबीनची लागवड ७०० हेक्‍टरवर झाली असून काढणी सुरू आहे.