नगर ः पाण्याची उपलब्धता असल्याने नगर जिल्ह्यात यंदा विक्रमी कांदा लागवड केली जात आहे. आतापर्यंत रब्बीत सुमारे १ लाख ५३ हजार हेक्टरवर कांदा लागवड झाली आहे. गतवर्षीपेक्षा सुमारे वीस हजार हेक्टर कांद्याचे क्षेत्र वाढले आहे. पारनेर तालुक्यात सर्वाधिक तब्बल ३१ हजार हेक्टरवर कांदा लागवड झाली आहे.

जिल्ह्यात यंदा पाण्याची उपलब्धता बऱ्यापैकी आहे. यंदा वेळेत ज्वारी पेरता आली नाही. त्या क्षेत्रावर तसेच कापसाचा हंगाम लवकरच आटोपला असल्याने त्याजागी कांद्याची लागवड केली जात आहे. त्यामुळे यंदा नगर जिल्ह्यात विक्रमी कांदा लागवड होणार असल्याचे दिसत आहे. आता काही ठिकाणी उन्हाळी कांदा लागवड सुरू झाली आहे.

गेल्या वर्षी रब्बी व उन्हाळी मिळून १ लाख ३० हजार हेक्टरवर कांदा लागवड झाली होती. यंदा फक्त रब्बीतच १ लाख ५३ हजार हेक्टरवर कांदा लागवड झाली आहे. अजून उन्हाळी लागवड व्हायची आहे. त्यामुळे यंदा कांद्याचे क्षेत्र पावणेदोन लाखाच्या जवळपास पोहोचण्याचा कृषी विभागाचा अंदाज आहे. सध्या कांद्याच्या काही ठिकाणी काढणी केलेला कांदा बाजारात येत असून, दरात चढ-उतार होत आहे.

तालुकानिहाय लागवड क्षेत्र (हेक्टर) नगर ः १८,५५७, पारनेर ः ३११७७, श्रीगोंदा ः २०१४७, कर्जत ः ११२७५, जामखेड ः २,५३५, शेवगाव ः ४,५७१, पाथर्डी ः ८,४०४, नेवासा ः ९,६६४, राहुरी ः १०,५९२, संगमनेर ः १०,४००, अकोले ः ४,८६६, कोपरगाव ः १०,६८१, श्रीरामपूर ः ७,६९८, राहाता ः ३,४०४