सोलापूर : आषाढी वारीत आरोग्य सुविधा देण्यासाठी राज्य शासनाने एक कोटी रुपयांचा विशेष निधी मंजूर केल्याची माहिती पालकमंत्री विजयकुमार देशमुख यांनी दिली.

आषाढी वारीच्या पार्श्‍वभूमीवर पालकमंत्री विजयकुमार देशमुख यांच्या निवासस्थानी आरोग्य विभागातील अधिकाऱ्यांची बैठक नुकतीच झाली. करमाळ्याचे आमदार नारायण पाटील, महाराष्ट्र राज्य आरोग्य संचालक डॉ. संजीव कांबळे, आरोग्य उपसंचालक, पुणे डॉ. संजय देशमुख, उपसंचालक, आरोग्य सेवा लातूरचे डॉ. श्रीरंग बोरसे, जिल्हा आरोग्य अधिकारी डॉ. शीतलकुमार जाधव आदी उपस्थित होते.

बैठकीच्या सुरवातीला पालकमंत्री देशमुख यांनी राज्यातील शासकीय रुग्णालयात देण्यात येणाऱ्या आणि पुरवठा करण्यात येणाऱ्या औषध गोळ्यांच्या पुरवठ्याचा आढावा घेतला. सोलापूरसह राज्यातील अनेक शासकीय दवाखान्यात गोळ्या - औषधांचा तुटवडा असल्याच्या तक्रारी येत आहेत. सध्या स्थिती काय आहे असे आरोग्य संचालक डॉ. संजीव कांबळे यांना विचारले असता गोळ्या औषध खरेदी ही हाफकीन संस्थेच्या वतीने खरेदी करण्यात येत आहेत, परंतु सद्यःस्थितीत सर्व दवाखान्यांत औषध उपलब्ध आहेत. ज्या ठिकाणी नसतील तेथे लगेच औषधाचा पुरवठा करण्यात येईल, असे सांगितले.

आषाढी वारीनिमित्त लाखो भाविक पंढरपुरात दाखल होत असतात. पंढरपुरात येणाऱ्या भाविकांच्या आणि पायी चालत येणाऱ्या भाविकांच्या आरोग्याची विशेष काळजी घेण्याचे आदेश पालकमंत्र्यांनी आरोग्य संचालक डॉ. संजीव कांबळे यांना दिले. शासनाच्या वतीने आषाढी वारीच्या पार्श्‍वभूमीवर आरोग्यासाठी एक कोटी रुपयांचा विशेष निधी उपलब्ध करून दिला आहे. त्यामुळे भाविकांच्या आरोग्याची विशेष काळजी घेण्यासाठी उपाययोजना कराव्यात, अशा सूचनाही त्यांनी केल्या.