नांदेड ः नांदेड जिल्हा मध्यवर्ती सहकारी बॅंकेच्या अध्यक्षपदासाठी शनिवारी (ता. १३) झालेल्या निवडणुकीत राष्ट्रवादी काँग्रेसचे डॉ. सुनील कदम हे विजयी झाले. या संदर्भात पीठासीन अधिकारी तथा जिल्हा उपनिबंधक (सहकारी संस्था) प्रवीण फडणीस यांनी माहिती दिली. नांदेड जिल्हा मध्यवर्ती सहकारी बॅंकेचे अध्यक्ष दिनकर दहिफळे यांचा कार्यकाळ संपल्यामुळे अध्यक्ष पद रिक्त झाले होते. 

त्यामुळे नवीन अध्यक्षाच्या निवडीसाठी शनिवारी (ता. १३) जिल्हा बॅंकेच्या सभागृहामध्ये संचालक मंडाळाची विशेष सभा बोलावण्यात आली होती. या वेळी जिल्हा उपनिबंधक (सहकारी संस्था) प्रवीण फडणीस पीठासीन अधिकारी म्हणून उपस्थित होते. अध्यक्षपदासाठी नामनिर्देशन पत्र दाखल करण्याच्या विहित मुदतीत राष्ट्रवादीचे डॉ. सुनील श्यामराव कदम व हरिहरराव भोसीकर या दोघांनी अर्ज दाखल केले. विहित मुदतीत कुणीही माघार न घेतल्यामुळे गुप्त पद्धतीने मतदान घेण्यात आले. 

विशेष सभेस बॅंकेचे २१ पैकी २० संचालक उपस्थित होते. मतमोजनीनंतर डॉ. कदम यांना ११, तर श्री. भोसीकर यांना ९ मते मिळाल्याचे स्पष्ट झाले. पीठासीन अधिकारी श्री. फडणीस यांनी डॉ. कदम यांची अध्यक्षपदी निवड झाल्याचे जाहीर केले. निवडणूक प्रक्रियेसाठी बॅंकेचे मुख्य कार्यकारी अधिकारी अजय कदम, सहायक निबंधक ए. डी. चव्हाण, संजय कार्लेकर, मुकेश सावळेश्वरकर, आर. एम. कांबळे आदींनी सहकार्य केले.