परभणी : जिल्ह्यातील मूग उत्पादक शेतकऱ्यांना उत्पादनातील घट आणि कमी बाजारभाव असा दुहेरी फटका बसला आहे. पावसामुळे भिजून डागील मुगाची आधारभूत किमतीपेक्षा १२०० ते ३५०० रुपये कमी दराने खरेदी केली जात आहे. उत्पादनात मोठी घट आल्यामुळे बाजार समित्यांमध्ये मुगाची आवक कमीच आहे.

यंदाच्या खरीप हंगामात मुगाची पेरणी झाल्यानंतर पावसाचा दीर्घ खंड पडला होता. यामुळे वाढीच्या परिपक्वतेच्या अवस्थेत पाण्याचा ताण बसला. फूलगळ झाल्यामुळे शेंगा लागल्या नाहीत. काही ठिकाणी विरळ प्रमाणात शेंगा लागल्या. अनेक भागात एकरी एक क्विंटलपेक्षाही कमी उतारा आला आहे.

दीर्घ खंडानंतर ऐन काढणीच्या कालावधीत पावसाची झड लागली होती. दररोजच्या पावसात भिजून शेंगांना मोड फुटले होते. शेंगा भिजल्यामुळे मुगाचे दाणे डागील झाले आहेत. चमकी वाणासदेखील चमक राहिलेली नाही. त्यामुळे जिल्ह्यातील कृषी उत्पन्न बाजार समित्यांमध्ये आधारभूत किंमत (५,५७५ रुपये) पेक्षा कमी बाजारभाव मिळत आहेत. चमकी मुगास ४००० ते ४२०० रुपये प्रतिक्विंटल, मोगलाई मुगास ३५०० ते ४००० रुपये प्रतिक्विंटल दर मिळत आहेत.

गेल्या महिनाभरात परभणी कृषी उत्पन्न बाजार समितीमध्ये गुरुवार(ता. २८)पर्यंत १,११८ क्विंटल मुगाची खरेदी झाली आहे. किरकोळ आवक सुरू आहे. आवक कमी असल्यामुळे दररोज लिलाव पध्दतीने खरेदी करता येत नाही असे बाजार समितीतील सूत्रांनी सांगितले.

गतवर्षीप्रमाणे यंदाही काढणीच्या वेळी पाऊस आल्यामुळे मूग डागील झाले आहेत. त्यामुळे बाजारभाव कमी मिळत आहेत. तसेच पावसाच्या खंडामुळे उत्पादनात घट आली आहे. त्यामुळे यंदा मूग उत्पादकांना दुहेरी फटका बसला आहे.