नगर ः नगर जिल्ह्यात यंदा चांगला पाऊस झाल्याने मुगाच्या उत्पादकतेत गेल्यावर्षीच्या तुलनेत तिप्पट वाढ झाली आहे. कृषी विभागाने पीक कापणी प्रयोगातून काढलेल्या उत्पादकतेनुसार नगर जिल्ह्यात हेक्टरी सरासरी ६७८ किलोचे उत्पादन निघाले आहे. गेल्यावर्षी हेच उत्पादन हेक्टरी केवळ १८० किलो एवढे निघाले होते. यंदा पाथर्डीत सर्वाधिक हेक्टरी ८२९ किलोचे उत्पादन निघाले आहे. श्रीगोंद्यात सर्वांत कमी ४१८ किलोचे उत्पादन निघाले आहे.

जिल्ह्यात यंदा सुरुवातीपासूनच चांगला पाऊस असल्याने मुगाची मोठ्या प्रमाणात पेरणी झाली. यंदा सुमारे ६० हजार हेक्टर क्षेत्रावर मुगाचे उत्पादन घेतले आहे. त्यात नगर, पारनेर, कर्जत तालुक्यात मुगाचे क्षेत्र अधिक होते. मध्यंतरी झालेल्या जास्तीच्या पावसामुळे मुगाचे काही प्रमाणात नुकसानही झाले आहे. करपा रोग पडल्याने मुगाची पाने पिवळी पडल्याने काहीसा मुगाला फटका बसला असल्याचा शेतकऱ्यांचा अंदाज आहे. मात्र, तरीही पावसाचे अन्य वातावरण चांगले असल्याने नगर जिल्ह्यात यंदा गतवर्षीच्या तुलनेत मुगाच्या उत्पादनात तिप्पट वाढ झाली आहे.

कृषी विभागाने पीक कापणी प्रयोगातून काढलेल्या उत्पादकतेनुसार नगर जिल्ह्यात हेक्टरी सरासरी ६७८ किलोचे उत्पादन निघाले आहे. गेल्यावर्षी हेच उत्पादन हेक्टरी केवळ १८० किलो एवढे निघाले होते. यंदा पाथर्डीत सर्वाधिक हेक्टरी ८२९, नगर तालुक्यात ७९४ किलो, जामखेडला ८०४ किलो, नेवाशाला ६९५ किलो, पारनेरला ५६४ किलो, कर्जतला ७६२ किलो, राहुरीला ६२० किलो, संगमनेरला ६३० किलो, श्रीगोंदात ४१८ किलोचे उत्पादन निघाले आहे, असे कृषी विभागातून सांगितले.