सांगली   ः आर. आर. पाटील यांनी ग्रामविकास, गृहमंत्री अशी खाती सांभाळली. त्यांनी  राज्यातील लोकांचा विकास हा केंद्रबिंदू डोळ्यांसमोर ठेवून समाजकारण केले. दिवंगत आर. आर. पाटील यांचे स्मारक युवकांना प्रेरणा देणारे ठरणार आहे, असे प्रतिपादन अर्थमंत्री सुधीर मुनगंटीवार यांनी  केले.

येथील मिरज रस्त्यावरील महात्मा गांधी विद्यार्थी वसतिगृहाच्या आवारातील नियोजित आर. आर. पाटील स्मृती स्मारकाचे भूमिपूजन शुक्रवारी (ता. १६) झाले. या वेळी मंत्री मुनगंटीवार बोलत होते. या वेळी माजी उपमुख्यमंत्री अजित पवार, गृह (ग्रामीण), वित्त व नियोजन राज्यमंत्री दीपक केसरकर, कृषी राज्यमंत्री सदाभाऊ खोत, राष्ट्रवादी काँग्रेसचे प्रदेशाध्यक्ष जयंत पाटील, आमदार सुमनताई पाटील, आमदार सुधीर गाडगीळ, आमदार अनिल बाबर, जिल्हाधिकारी विजयकुमार काळम-पाटील आदी मान्यवर उपस्थित होते.

मंत्री मुनगंटीवर म्हणाले, की चंद्रपूरमधून मी निवडणूक जिंकली. त्यानंतर विधिमंडळात आलो. आर. आर. पाटील यांची भाषणे ग्रंथालयात वाचली. १९९५ ला मी पहिले भाषण केले. त्या वेळी मला चिठ्ठी पाठवली. त्यामध्ये आबांनी असे लिहिले होते की, भाषण चांगले झाले. त्यापासून विधिमंडळात ते माझे मार्गदर्शक ठरले.  

जयंत पाटील म्हणाले, की आज आर. आर. पाटील विधानसभेत असते तर सत्तारूढ पक्षाला नाकीनऊ आले असते. ग्रामविकास मंत्री असताना आबांनी संत गाडगेबाबा ग्रामस्वच्छता अभियान राबवले. आज दिल्लीपासून गल्लीपर्यंत ‘स्वच्छ भारत योजना’ पंतप्रधान नरेंद्र मोदी राबवत आहेत. या योजनेची प्रेरणा संत गाडगेबाबा ग्रामस्वच्छता अभियानातून घेतली आहे.

अजित पवार म्हणाले, की आबा सर्वसामान्य जनतेच्या हिताचे निर्णय घ्यायचे. विलासराव देशमुख, आर. आर. पाटील, गोपीनाथ मुंडे यांची राज्याला गरज होती. पण त्यांच्या अकाली जाण्याने प्रचंड मोठी पोकळी निर्माण झाली आहे.