पुणे : गेल्या दोन दिवसांपासून उत्तर भारतात पुन्हा मॉन्सून सक्रिय झाला आहे. शनिवारी (ता. १९) उत्तर अरबी समुद्र, गुजरात, सौराष्ट्र, मध्य प्रदेश, कच्छचा परिसर, राजस्थानचा काही भाग आणि उत्तर प्रदेशच्या पश्‍चिम भागापर्यंत मॉन्सूनने प्रगती केली आहे. अनेक भागांत मेघगर्जनेसह जोरदार पाऊस पडत असल्याचे हवामान विभागाच्या सूत्रांनी सांगितले. 

सध्या राजस्थान, उत्तर प्रदेश, हरियाना, चंडिगड, दिल्ली, पंजाब या भागांत मॉन्सूनने फारशी प्रगती केलेली नाही. मात्र पुढे सरकरण्यासाठी पोषक वातावरण तयार होत असल्याने लवकरच आणखी काही भागांत दाखल होण्याचे संकेत आहेत. दरम्यान, शनिवारी मॉन्सूनने बारमेर, भिलवारा, ढोलपूर, अलिगड, मिरूट, अंबाला आणि अमृतसर या भागांपर्यंत मजल मारली आहे. यंदा हवामान विभागाने पहिल्या टप्प्यात ९८ टक्के, तर दुसऱ्या टप्प्यात १०१ टक्के पावसाचा अंदाज वर्तविला आहे. त्यामुळे राज्यात चांगला पाऊस पडण्याची अपेक्षा व्यक्त केली जात आहे.