हिंगोली ः नांदेड परिमंडळअंतर्गत हिंगोली मंडळ कार्यालयाच्या परिसरात एकात्मिक ऊर्जा विकास कार्यक्रम (आयपीडीएस) योजनेतून उभारण्यात आलेले महावितरण कंपनीचे राज्यातील पहिले गॅस इन्सुलेटेड प्रणाली (जीआयएस) उपकेंद्र केंद्र नुकतेच कार्यान्वित करण्यात आले. यामुळे चार हजार वीजग्राहकांना अंखड तसेच योग्य दाबाने वीजपुरवठा होणार आहे, अशी माहिती महावितरणच्या सूत्रांनी दिली.

या गॅस इन्सुलेटेड प्रणाली (जीआयएस) वीज उपकेंद्राचे भूमिपूजन ऊर्जामंत्री चंद्रशेखर बावनकुळे यांनी १७ मे २०१७ रोजी केले होते. खाकीबाबा मठ उपकेंद्र या नावाने ओळखल्या जाणाऱ्या या उपकेंद्रातून नवीन आठ ११ केव्ही वीजवाहिन्यांची निर्मिती करण्यात आली आहे. या उपकेंद्राचा लाभ हिंगोली शहरातील जवळपास चार हजार वीज ग्राहकांना होणार आहे. अखंडित, योग्य दाबाचा वीजपुरवठा करण्यास या उपकेंद्राची मदत होणार आहे.

लिंबाळा येथील २२० किव्हो या अतिउच्च दाब विद्युत केंद्राद्वारे खाकीबाबा मठ उपकेंद्रास ३३ किव्हो दाबाचा वीजपुरवठा होणार आहे. औरंगाबाद प्रादेशिक कार्यालयाचे सहव्यवस्थापकीय संचालक ओमप्रकाश बकोरिया यांचे मार्गदर्शन तर तत्कालीन मुख्य अभियंता अविनाश पाटोळे, प्रभारी मुख्य अभियंता आजिनाथ सोनवणे, हिंगोली मंडळाचे अधीक्षक अभियंता सुधाकर जाधव यांच्या पाठपुराव्यामुळे या उपकेंद्राचे काम गतीने करता आले.