नागपूर   : " नोटाबंदीमुळे देशाची लूट झाली, असे म्हणणारे डॉ. मनमोहन सिंग यांच्या पंतप्रधानपदाच्या  कार्यकाळात देशामध्ये अनेक आर्थिक घोटाळे झाले व त्यामुळे अर्थव्यवस्था बिघडली आहे. गेल्या तीन वर्षांमध्ये नरेंद्र मोदी यांच्या पंतप्रधानाच्या काळात देशाची अर्थव्यवस्था जगात सर्वाधिक गतीमान झाली आहे ", असा दावा मुख्यमंत्री देवेंद्र फडणवीस यांनी पत्रकार परिषदेत केला.

नोटाबंदीला एक वर्ष झाल्याच्या निमित्ताने  मुख्यमंत्र्यांनी नोटाबंदीच्या निर्णयाचे समर्थन केले. या निर्णयाच्या परिणामाची माहिती देताना मुख्यमंत्री म्हणाले, " नोटाबंदीच्या निर्णयाने देशाची अर्थव्यवस्था सर्वच बाबतीत अधिक भक्कम झाली. डिजिटल व्यवहारांमध्ये वाढ झाली. करदात्यांच्या संख्येत मोठ्या प्रमाणावर वाढ झाली. दहशतवाद्यांच्या व नक्षलवाद्यांच्या कारवायांमध्ये घट झाली आहे. काळा पैसा मोठ्याप्रमाणावर बाहेर आला आहे. तसेच लेस कॅश ईकॉनॉमीमध्ये वाढ झाली आहे . "

माजी पंतप्रधान डॉ. मनमोहन सिंग यांनी नोटाबंदीमुळे देशाची लूट झाल्याची टीका केल्याचे निदर्शनास आणून दिल्यानंतर ते म्हणाले, " डॉ. मनमोहन सिंग ज्येष्ठ अर्थतज्ज्ञ आहेत. परंतु त्यांच्या कार्यकाळातच अनेक घोटाळे झाले आहेत. त्यामुळे देशाची अर्थव्यवस्था रसातळाला गेली होती. नरेंद्र मोदी अर्थतज्ज्ञ नाहीत. ते एक राजकीय व्यक्ती आहेत. परंतु त्यांनी देशाच्या अर्थव्यवस्थेला एक वेगळे वळण दिले आहे . "

पेट्रोल व दारुच्या विक्रीला जीएसटी लागू करावीच लागेल, असे सांगून मुख्यमंत्री म्हणाले,"   देशातील सर्व राज्यांच्या अर्थमंत्र्यांनी पेट्रोल व दारु जीएसटीच्या परिघात आणू नये, अशी मागणी केली होती. जीएसटीची प्रक्रिया सुरळीत होईपर्यंत पेट्रोल व दारु जीएसटीच्या बाहेर राहील परंतु भविष्यात पेट्रोल व दारुवर जीएसटी लागू करावी लागेल ."