नांदेड ः शौचालय बांधकामात राज्‍याचे काम देशात उत्‍कृष्‍ट ठरले आहे. गावाला शाश्‍वत स्‍वच्‍छतेत टिकून ठेवण्‍यासाठी शौचालयाच्या वापरासह परिसर स्‍वच्‍छ ठेवल्‍यास ग्रामीण भागातील नागरिकांचे आरोग्‍यमान उंचावेल, असे प्रतिपादन भारत सरकारच्‍या पेयजल व स्‍वच्‍छता मंत्रालयाच्‍या स्‍वच्‍छ भारत मिशन(ग्रामीण)चे संयुक्‍त सचिव अरुण बरोका यांनी केले.

राष्‍ट्रीय वार्षिक स्‍वच्‍छता सर्वेक्षणासाठी मंगळवारी (ता. १५) श्री. बरोका नांदेड जिल्‍हा दौऱ्यावर आले होते. त्यांनी कंधार तालुक्‍यातील उस्‍माननगर व मंगल सांगवी या गावांना भेट देऊन गावांची पाहणी करून नागरिकांशी संवाद साधला. त्‍या वेळी ते बोलत होते. 

या वेळी जिल्‍हा परिषदेचे मुख्‍य कार्यकारी अधिकारी अशोक काकडे, पेयजल व स्‍वच्‍छता मंत्रालयाचे तज्ज्ञ अविनाश स्‍वरूप, औरंगाबाद विभागीय आयुक्‍त कार्यालयाचे विकास विभागाचे सहायक आयुक्‍त अनंत कुंभार, पाणी व स्‍वच्‍छता सहाय्य संस्‍थेचे विभागीय सल्‍लागार अरुण रसाळ, उपमुख्‍य कार्यकारी अधिकारी जी. एल. रामोड, कार्यकारी अभियंता मिलिंद गायकवाड, विस्‍तार अधिकारी उल्‍हास खळेगावकर, कंतार पब्लिक संस्‍थेचे सल्‍लागार कलिम अहमद आदींची उपस्थिती होती.

बरोका म्‍हणाले, ‘‘नांदेड जिल्ह्यातही पायाभूत सर्वेक्षणानुसार चांगली कामे झाली आहेत.’’