हिंगोली : जून ते ऑक्टोबर दरम्यान अतिवृष्टीमुळे जिल्ह्यातील ३ लाख ७ हजार ८३० शेतकऱ्यांच्या २ लाख २७ हजार ६८ हेक्टरवरील पिकांचे ३३ टक्के पेक्षा अधिक नुकसान झाले. शेतकऱ्यांना मदत देण्यासाठी जिल्हा प्रशासनाने १५४ कोटी ७१ लाख ७३ हजार ७१८ रुपये निधीची मागणी केली. 

यंदा अनेक मंडळांमध्ये अतिवृष्टी झाली. काही मंडळांत ढगफुटी झाली. ओढे, नाले, तसेच कयाधू नदीला आलेल्या पुराचे पाणी शेतात शिरले. सिद्धेश्वर धरणातून पाणी सोडण्यात आल्यामुळे पूर्णा नदीला आलेल्या पुराचे पाणी शिरून नदीकाठच्या पिकांचे नुकसान झाले. जमिनी खरडून गेल्या.

यंदा खरिपात ३ लाख ९६ हजार १७९ हेक्टरवर पेरणी झाली होती. अतिवृष्टीमुळे एकूण ३ लाख ६ हजार ७४७ शेतकऱ्यांच्या २ लाख २६ हजार ७०१ हेक्टरवरील जिरायती पिकांचे ३३ टक्के पेक्षा अधिक नुकसान झाले. त्यात सोयाबीनचे २ लाख ४४९ हेक्टर, कपाशीचे २१ हजार ४३२ हेक्टर, ज्वारी १ हजार ८७८ हेक्टर, मूग १ हजार ४१४ हेक्टर, उडीद १ हजार ५२० हेक्टर या पिकांचा समावेश आहे. 

नुकसानीची मदत देण्यासाठी एकूण १५४ कोटी १५ लाख ६७ हजार ८८८ रुपये निधीची मागणी करण्यात आली. बागायती क्षेत्रातील पिकांमध्ये ८७६ शेतकऱ्यांच्या २२५ हेक्टरवरील हळदीचे नुकसान झाले. ३० लाख ४५ हजार ३३० रुपये निधीची मागणी करण्यात आली. एकूण २०७ शेतकऱ्यांच्या १४२ हेक्टरवरील केळी पिकाचे नुकसान झाले. त्यासाठी २५ लाख ६० हजार ५०० रुपये निधीची मागणी करण्यात आली, असे महसूल विभागाच्या सूत्रांनी सांगितले. 

पीक नुकसान स्थिती (हेक्टरमध्ये)