परभणी : मागील पावसाळ्यात ऑक्टोबर, नोव्हेंबरपर्यंत पाऊस लांबला. त्यामुळे सिरपूर (ता. पालम)येथील निर्यातदार गटातील शेतकऱ्यांना भेंडीची वेळेवर लागवड करता आली नाही. परिणामी, उत्पादनास उशीर झाला. त्यानंतर ‘कोरोना’मुळे लॅाकडाऊन सुरु झाला. त्यामुळे यंदा शेतकरी गटांची भेंडी निर्यात खंडीत झाली. स्थानिक बाजारपेठेतील आवक वाढली, तर दर घसरले. त्यामुळे भेंडी उत्पादकांचे नुकसान होत आहे. 

सिरपूर येथे ‘आत्मा’तंर्गंत संतकृपा शेतकरी बचत गटाची स्थापना करण्यात आली. त्यामध्ये अध्यक्ष सुभाष आवरगंड, सचिव पशुपतीनाथ शेवटे यांच्यासह २७ शेतकऱ्यांचा समावेश आहे. २०१३ -१४ ते २०१८-१९ या कालावधीत दुष्काळी वर्षांचा अपवाद वगळता या शेतकरी गटातर्फे ३५ ते ९० टन भेंडीची निर्यात संयुक्त अरब अमिराती, जर्मनी, फ्रान्स, ब्रिटन आदी देशांत करण्यात आली. 

मागील वर्षी ऑगस्ट- सप्टेंबर ते ऑक्टोंबर- नोव्हेंबरपर्यंत सतत पाऊस सुरु होता. त्यामुळे गटातील शेतकऱ्यांना ऑगस्ट महिन्यात भेंडीची लागवड करता आली. दरवर्षी ऑक्टोंबर अखेरपर्यंत भेंडी निर्यात सुरु होते. परंतु, यंदा नोव्हेंबर अखेरीस लागवड झाली. त्यामुळे जानेवारी अखेरीस भेंडीचे उत्पादन सुरु झाले.

यंदा निर्यातदार बदलण्यात आला. परभणी येथील कृषी विज्ञान केंद्रात निर्यादारांसोबत बैठक झाली. परंतु, मार्च महिन्यात राज्यासह देशात कोरोना महामारीमुळे लॅाकडाऊन सुरु झाला. विमानसेवा, देशांर्गंत वाहतूक बंद झाली. त्यामुळे यंदा सिरपूर येथून भेंडीची निर्यात होऊ शकली नाही. 

यंदा या गटातील शेतकऱ्यांनी २० एकरवर भेंडी लागवड केली आहे. सध्या दररोज १५ ते २० क्विंटल भेंडी उत्पादन निघत आहे. निर्यात बंद असल्यामुळे स्थानिक बाजारपेठेत विक्री करावी लागत आहे. त्यामुळे भेंडी उत्पादकांचे नुकसान होत आहे.