नगर ः नगर लोकसभा मतदारसंघात मंगळवारी (ता. २३) मतदान प्रक्रिया पार पडली. तांत्रिक बिघाडामुळे मशिन बंद होण्याचे काही प्रकार वगळता मतदारसंघात मतदान प्रक्रिया सुरळीत पार पडली. उन्हाचा तडाखा असूनही मतदानासाठी नागरिकांनी रांगा लावल्या होत्या. या मतदारसंघात राष्ट्रवादी काँग्रेस-काँग्रेस, शिवसेना- भाजप, बहुजन वंचित आघाडी या पक्षांसह १९ उमेदवार रिंगणात होते. सायंकाळी सहा वाजेपर्यंत 63 टक्के मतदान झाले. महिला, तरुण, ज्येष्ठ नागरिकांसह दिव्यांग व्यक्तींचाही मतदानासाठी उत्साह दिसत होता.

राज्यात सातत्याने चर्चेत राहिलेल्या नगर लोकसभा मतदारसंघात मंगळवारी मतदान प्रक्रिया पार पडली. या मतदारसंघात १८ लाख ५६ हजार मतदार होते. २०३० मतदान केंद्रांवर ही प्रक्रिया पार पडली. सायंकाळी चार वाजेपर्यंत ५० टक्के मतदान झाले. सकाळी सात वाजता मतदानाला सुरवात झाली. सध्या उन्हाचे दिवस असल्याने सकाळीच मतदारांनी मतदानासाठी रांगा लावल्या होत्या. दुपारी नऊ वाजेपर्यंत दहा टक्के, अकरा वाजेपर्यंत ३० टक्के, एक वाजेपर्यंत ४० टक्के, तर सायंकाळी चार वाजेपर्यंत सरासरी ५० टक्के मतदान झाले.

जिल्ह्यामध्ये अनेक भागांत या वेळी तांत्रिक बिघाडामुळे मतदान यंत्रे बंद पडण्याचे प्रकार घडले. त्यामुळे प्रशासनाला मशिन बदलण्यासाठी धावपळ करावी लागली. त्यामुळे मात्र सुरवातीला एक ते दीड तास मतदान प्रक्रिया उशिराने सुरू झाली. अनेक ठिकाणी मतदारांचे स्वागत करण्यात आले. राज्यात याआधी मोबाईलचा मतदान करतेवेळी गैरवापर झाल्याचे प्रकार घडल्यामुळे नगरमध्ये मोबाईल घेऊन मतदान केंद्रात प्रवेश दिला जात नव्हता. काही ठिकाणी पोलिसांकडून मतदारांना मोबाईलच्या कारणावरून अरेरावी केली जात होती.

नगरमध्‍ये रेणावीकर शाळेतील मतदान केंद्रात पोलिसांकडून नागरिकांची हेळसांड करण्यात आल्याचे सांगण्यात आले. दुपारी चारनंतर पुन्हा मतदारांनी मतदानासाठी केंद्रावर गर्दी केली होती. राष्ट्रवादीचे उमेदवार संग्राम जगताप यांनी नगर शहरात, ज्येष्ठ समाजसेवक अण्णा हजारे यांनी राळेगणसिद्धी येथे मतदानाचा हक्क बजावला. राष्ट्रवादी व भाजपकडून विजयाचा दावा केला जात आहे.