अकोला : जिल्हा परिषदेच्या पुढाकाराने प्रथमच शनिवारी (ता.२२) जिल्ह्यातील प्रत्येक ग्रामपंचायतीत विशेष ग्रामसभा घेण्यात आली. या ग्रामसभांचे डिजिटल यंत्रणांचा वापर करीत यु ट्यूबवर थेट प्रक्षेपण करण्यात आले. देशात अशा प्रकारचा प्रयोग करणारा अकोला हा पहिला जिल्हा ठरल्याचा दावा केला जात आहे.  

जिल्हाधिकारी जितेंद्र पापळकर, मुख्य कार्यकारी अधिकारी आयुष प्रसाद यांची ही संकल्पना होती; तर अध्यक्षा संध्याताई वाघोडे, उपाध्यक्ष जमीरउल्ला खाँ पठाण यांनी मार्गदर्शन केले. जिल्हा प्रशासनाने आवाहन करीत शनिवारी विशेष ग्रामसभा घेण्याचे सर्व गावांना कळविले होते. यानुसार झालेल्या ग्रामसभेत पंतप्रधान नरेंद्र मोदी यांनी सरपंचांना पाठविलेल्या विशेष पत्राचे वाचन करण्यात आले.

सोबतच आयुष्मान भारत योजना लाभार्थी यादी, महाराष्ट्र राज्य ग्रामीण रोजगार हमी योजनेअंतर्गत कामांविषयी सेल्फ तयार करणे, पंतप्रधान आवास योजना, रमाई, शबरी, दीनदयाळ उपाध्याय घरकुल आवास योजनांची पात्र, अपात्र यादी, घरकुल पात्र लाभार्थी यांचे अतिक्रमण नियमानुकूल करण्याबाबत अहवाल तयार करणे, राज्यपुरस्कृत घरकुल लाभार्थी निवड, स्वच्छ भारत मिशन, वाढीव कुटुंब यादी, ३३ कोटी वृक्ष लागवडीबाबत माहिती, शेतकरी सन्मान योजना आदी विषय या सभांमध्ये चर्चेसाठी ठेवण्यात आले होते. प्रत्येक ग्रामपंचायतीच्या सभेसाठी संपर्क अधिकारी नेमण्यात आले होते.