वाशीम : अतिवृष्टीमुळे शेतकऱ्यांचे मोठे नुकसान झाले आहे. शासनाकडून या शेतकऱ्यांना नुकसानभरपाई मिळण्यासाठी सर्वतोपरी प्रयत्न करणार असल्याची माहिती विरोधी पक्षनेते देवेंद्र फडणवीस यांनी दिली. फडणवीस व प्रवीण दरेकर यांनी शनिवारी (ता. २) मंगरुळपीर तालुक्यातील शिवणी रोड व मोझरी येथे अतिवृष्टीमुळे झालेल्या नुकसानग्रस्त भागाची पाहणी केली.  दोन्ही नेते मराठवाडा आणि विदर्भाच्या दौऱ्यावर आहेत. ते दोघेही पूरग्रस्त भागाची पाहणी करण्यासाठी जात असताना शिवणी रोड व मोझरी येथील नुकसान झालेल्या शेतकऱ्यांशी भेटले. हा दौरा प्रशासनाला जागे करण्यासाठी आहे. ओल्या दुष्काळामुळे शेतकरी संकटात आहे. त्यामुळे राज्य सरकारने राजकारण न करता शेतकऱ्यांना तत्काळ मदत करावी, एक दुसऱ्याकडे बोट दाखवून काहीही होणार नाही, शेतकऱ्यांना मदत करणे गरजेचे आहे, असेही फडणवीस म्हणाले.  या वेळी शेतकऱ्यांनी व्यथा मांडताना आधीच अस्मानी संकटात आम्ही सापडलो आहे. प्रशासनाच्या एकाही अधिकाऱ्यांने आतापर्यंत पाहणी केली नाही. उपविभागीय अधिकारी, तहसीलदार, तलाठीसुद्धा यायला तयार नाहीत. विमा कंपन्याचे अधिकारी विमा देत नाहीत. आम्ही जावे तरी कोणाकडे, अशी व्यथा शेतकऱ्यांनी मांडली.