नाशिक : जिल्ह्यात मध्यरात्रीनंतर ढगाळ वातावरण तयार झाले होते. शुक्रवारी (ता.१९) पहाटे अनेक ठिकाणी विजांच्या कडकडाटासह हलक्या सरी झाल्या. तर अनेक ठिकाणी ढगाळ वातावरण कायम होते. गहू व हरभरा सोंगणी, द्राक्ष काढणी सुरू असताना सरी आल्याने शेतकऱ्यांची तारांबळ उडाली. निफाड येथील कृषी संशोधन केंद्रावर २.४ मिमी पावसाची नोंद झाली. 

जिल्ह्याच्या अनेक भागात पहाटे विजांचा कडकडाट होता. यासह निफाड, चांदवड, दिंडोरी, पेठ, कळवण व सटाणा तालुक्याच्या अनेक भागात हलक्या पावसाचा शिडकारा झाला. अनेक भागात गहू व हरभरा सोंगणी हंगाम शेवटच्या टप्प्यात आहे. त्यामुळे चांदवड तालुक्यातील काही ठिकाणी पिकांचे नुकसान झाले. पाऊस कमी असूनही थेंबामुळे कांदा डेंगळ्यांचे काही अंशी नुकसान झाले.

कळवण तालुक्यात खरीप कांदा  काढण्याची लगबग असल्याने कांदा झाकण्यासाठी शेतकऱ्यांची एकच धावपळ उडाली. त्यामुळे अचानक आलेल्या पावसाने सर्वत्र गोंधळ झाल्याचे दिसून आले. पेठ तालुक्यातील अनेक भागात हलक्या सरी झाल्या. मात्र नुकसान झाले नसल्याचे येथील शेतकऱ्यांनी सांगितले.

येवला तालुक्यात ढगाळ वातावरण होते. निफाड तालुक्यात काही ठिकाणी पाऊस झाला. गहू पिकाला फटका बसला. द्राक्ष उत्पादकांमध्ये भीतीचे वातावरण आहे. 

द्राक्ष उत्पादकांत धास्ती कायम 

ढगाळ वातावरण तयार झाले. त्यामुळे द्राक्ष उत्पादकांमध्ये धास्ती कायम आहे. सध्या द्राक्ष हंगामाचे कामकाज मध्याच्या पुढे आले आहे. त्यात दरात घसरण, व्यापाऱ्यांकडून मर्यादित खरेदी, यामुळे शेतकरी अडचणीत आहेत.