खरसुंडी, जि. सांगली : जांभुळणी (ता. आटपाडी) येथील साठवण तलावाच्या कालव्याची लघू पाटबंधारे विभागाने ४८ वर्षांत दुरुस्ती केली नाही. कालव्यात उगवलेल्या झाडा-झुडपांमुळे पाण्याची गळती सुरू आहे. परिणामी, कालव्याचे पाणी गरजू शेतकऱ्यांना न मिळता वाया जात आहे. त्यामुळे कालवा दुरुस्तीची मागणी शेतकऱ्यांनी केली आहे. 

आटपाडी तालुक्‍याच्या पश्‍चिम भागात पहिला जांभुळणी साठवण तलाव आहे. त्याची पाणी साठवण क्षमता १०९.२६ दशलक्ष घनफूट आहे. तलावास अजिबात गळती नसल्यास वर्षभर पाणी टिकते.

चार गावांच्या पाणीपुरवठा योजना याच तलावातून आहेत. तलावास कालवा शेतीसाठी सन १९७२ साली पाटबंधारे विभागाने जांभुळणीच्या शेतकऱ्यांसाठी काढला. तो पूर्ण मातीचा आहे. त्यास अस्तरीकरण नाही. त्यामुळे झाडेझुडपे उगवली आहेत. आठ किलोमीटर लांबीच्या कालवा त्यामुळे दिसेनासा झाला आहे.  

‘‘पुढील आठवड्यात दुरुस्ती व अस्तरीकरणाबाबत प्रस्ताव तयार करणार आहे. तो अर्थसंकल्पात सादर केला जाईल.`` असे लघू पाटबंधारे अभियंता केंगार यांनी सांगितले.