पळशी ता. सिल्लोड : मका पिकावर लष्करी अळीचा प्रादूर्भाव रोखण्यासाठी नेमके काय करावे, याविषयीचा जागर जिल्हा परिषदेच्या कृषी विभागाने १५३ गावांत सुरू केला आहे. कृषी विकास अधिकारी आनंद गंजेवार याविषयी प्रत्यक्ष बांधावर जाऊन शेतकऱ्यांमध्ये जागृती करण्याचा प्रयत्न करीत आहेत. बुधवारी(ता.१५) पळशी (ता. सिल्लोड) येथे हे प्रात्यक्षिक शेतकऱ्यांना दाखविण्यात आले. 

रब्बीतील मका पिकावरील लष्करी अळीच्या नियंत्रणासाठी एकात्मिक कीड व्यवस्थापन कसे करावे, याचे प्रात्यक्षिक व प्रशिक्षण औरंगाबाद जिल्ह्यातील १५३ गावात देण्याचा निर्णय जिल्हा परिषदेच्या कृषी विभागाने हाती घेतला. त्यासाठीचे नियोजन जिल्हा परिषदेच्या कृषी विकास अधिकारी कार्यालयाकडून करण्यात आले होते.

खोल नांगरट, गूळ फवारणी, कामगंध सापळ्याद्‌वारे व प्रकाश सापळ्याद्‌वारे मास ट्रॅपिंग करून पतंग नष्ट करणे, निंबोळी अर्काची नियमित फवारणी करून पतंगास अंडी घालण्यापासून परावृत्त करणे, जैविक कीडनाशकाचा वापर, या कमी खर्चाच्या व महत्त्वाच्या बाबीवर शेतकऱ्यांनी लक्ष दिल्यास लष्करी अळीचे नियंत्रण शक्‍य आहे, याचे प्रात्यक्षिके दाखविण्यात येत आहेत. 

गंजेवार यांनी थेट शेतकऱ्यांना लष्करी अळीचा प्रादूर्भाव व त्याच्या नियंत्रणासाठी करावयाच्या उपायांची माहिती शेतकरी भास्कर बडक यांच्या शेतावर प्रत्यक्ष प्रात्यक्षिकातून शेतकऱ्यांना दिली. पंचायत समितीचे कृषी अधिकारी संजय व्यास, कृषी सहायक मीनाक्षी ढाकरे, सरपंच, उपसरपंच, पंचायत समिती सदस्य, अमोल शिंदे, पीक व्यवस्थापन तज्ज्ञ त्रिपाठी, क्षेत्रीय सहायक अनिल पवार, पंचायत समितीचे रमेश दळवी आदींची उपस्थिती होती.