जळगाव : रासायनिक खतांचा खरिपासंबंधीचा पुरवठा जिल्ह्यात रखडत सुरू आहे. त्यासंबंधीची गती वाढविण्याबाबत कृषी यंत्रणा पावले उचलणार असल्याची माहिती मिळाली. 

जिल्ह्यात खरिपात सप्टेंबरअखेरपर्यंत तीन लाख ४० हजार मेट्रिक टन रासायनिक खतांचा पुरवठा होणार आहे. हा पुरवठा एप्रिलपासून सुरू झाला. एप्रिल व मे महिन्यात मिळून ८८ हजार ४२४ मेट्रिक टन खतांचा पुरवठा अपेक्षित आहे. आतापर्यंत ४९ हजार ६०४ मेट्रिक टन खतांचा पुरवठा झाला आहे. हा पुरवठा रखडत सुरू असल्याचे लक्षात आल्यानंतर कृषी यंत्रणांनी कंपन्यांशी चर्चा सुरू केली. यात ज्या खतांची विक्री होईल, त्यावरच कंपन्यांना अनुदान मिळत असल्याने हा पुरवठा कंपन्यांकडून रखडत सुरू असल्याचे समोर आले. 

कंपन्यांच्या स्तरावर सहा हजार ४३८ मेट्रिक टन युरिया शिल्लक आहे. विक्रेत्यांकडेदेखील मोठ्या प्रमाणात युरिया शिल्लक आहे. हा साठा सुमारे १५ हजार टनांवर असल्याचा दावा कृषी विभागाने केला. 

पावसाळ्यासंबंधी अजून संकेत मिळालेले नाहीत. परंतु जिल्ह्यात युरियासह सरळ खते पुरेशा प्रमाणात उपलब्ध व्हावीत, यासाठी कंपन्यांशी पत्रव्यवहार झाला आहे. फॉस्फेट, पोटॅशची उपलब्धता सध्या मुबलक आहे.

जिल्ह्यात रावेर, यावल, मुक्ताईनगर व चोपडा भागांत खतांची मागणी आहे. या भागातही पोटॅश व इतर संयुक्त खतांचा उठाव आहे. इतरत्र फारशी उचल सुरू नाही. यामुळे खतांची मोठी टंचाई नसल्याचेही सांगण्यात आले.