जोतिबा डोंगर, जि. कोल्हापूर: जोतिबाच्या खेट्यास रविवार(ता. १६)पासून प्रारंभ झाला. यासाठी महाराष्ट्र, कर्नाटक, गुजरात, आंध्र प्रदेश या राज्यांतून दीड लाखावर भाविक दर्शनासाठी आले. रविवारी सकाळी मंदिरात विविध धार्मिक कार्यक्रमांचे आयोजन करण्यात आले. सकाळी अभिषेक, सालंकृत महापूजा तसेच धुपारती सोहळा झाला.   जोतिबाच्या खेट्यांना पहाटे चार वाजल्यापासून पारंभ झाला. कुशिरे, पोहाळे गिरोली, दाणेवाडी या भागातील डोंगराकडे येणारे पायी रस्ते गर्दीने फुलून गेले. त्यांना जत्रेचे स्वरूप येते. पहाटेच्या प्रहरी हा डोंगर परिसर चांगभलंच्या गजराने जयघोषाने दुमदुमून गेला. कोल्हापुरातील भाविक पंचगंगा नदीपासून अनवाणी पायी चालत आले, तर पंढरपूर, बार्शी, बेळगाव, सांगली, सातारा या भागातील भाविक गायमुख तलाव मार्गे पायी आले.  माघ महिन्यातील पाच रविवारी जोतिबा डोंगरावर भरणाऱ्या यात्रेस जोतिबाचे खेटे असे म्हणतात. या रविवारी भाविक शक्यतो अनवाणी पायाने चालत येतात. यामध्ये महिला, वयोवृद्ध, चिमुकले, तरुण वर्गातील भाविकांची संख्या लक्षणीय असते. गर्दीमुळे संपूर्ण ज्योतिबा डोंगर गर्दीने फुलून जातो. या वेळी चांगभलंचा अखंड जयघोष होतो. कोल्हापुरातील भाविक तर पंचगंगा नदी ते कुशिरे गायमुख तलाव मार्ग ज्योतिबा वर येतात. सांगली, सातारा, बेळगाव, पुणे मुंबई या भागातील भाविक गायमुख तलाव, पायरी रस्ता, दक्षिण दरवाजा मार्ग अनवाणी पायाने चालत जोतिबावर येतात.