जळगाव ः महात्मा ज्योतिराव फुले शेतकरी कर्जमुक्ती योजनेंतर्गत शनिवारी (ता. २९) जिल्ह्यातील १ लाख ४३ हजार ८३२ शेतकऱ्यांची यादी जाहीर केली. सोमवारपासून (ता. २) जिल्ह्यात सर्वत्र शेतकऱ्यांच्या खात्यांवर प्रमाणीकरणाची प्रक्रिया सुरू झाली आहे. जिल्ह्यातील ३ हजार ६५७ केंद्रांवर पडताळणी होणार आहे.  एप्रिल २०१५ ते मार्च २०१९ केलेल्या अल्पमुदत पीककर्जाचे, पुनर्गठन/ फेरपुनर्गठन करून मध्यम मुदत कर्जात रूपांतर केलेल्या एक किंवा एकापेक्षा जास्त ज्या कर्ज खात्यात ३० सप्टेंबर २०१९ रोजी मुद्दल व व्याजासह थकीत असलेल्या व परतफेड न झालेल्या हप्त्याची रक्कम २ लाखापर्यंत असल्यास त्यांना कर्जमुक्तीचा लाभ देण्यात येईल.  ३ हजार ६५७ केंद्रावर पडताळणी  शेतकऱ्यांच्या खात्यावर कर्जमाफीची रक्कम जमा होणार आहे. त्यासाठी जिल्ह्यात ३ हजार ६५७ केंद्रे सुरू करण्यात आली आहेत. त्यात ग्रामपंचायतीच्या ८५१ आपले सेवा केंद्र, महसूल विभागाचे सीएससी सेंटर ग्रामीण भागात ५४५ व शहरी भागातील ३२०, रेशन दुकाने १९४१ यांचा समावेश आहे. शेतकऱ्यांना जिल्ह्यातील कोणत्याही केंद्रावर पडताळणी करता येईल. मात्र, त्यांचे त्या यादीत असायला हवे.