दापोली, जि. रत्नागिरी : जगभरात दरवर्षी १८ सप्टेंबर हा दिवस जागतिक बांबू दिन म्हणून साजरा केला जातो. त्याचे औचित्य साधत येथील डॉ. बाळासाहेब सावंत कोकण कृषी विद्यापीठाअंतर्गत वनशास्त्र महाविद्यालयाच्या प्रक्षेत्रावर बांबू व काष्ठ कार्यशाळेचे उद्घाटन कुलगुरू डॉ. संजय सावंत यांच्या हस्ते करण्यात आले.

जागतिक बांबू दिनाच्या निमित्ताने वनशास्त्र महाविद्यालयात पारंपरिक कार्यशाळेत नवीन उपकरणे व यंत्रे बसवून आधुनिक अशी बांबू व काष्ठ कार्यशाळा सुरू करण्यात आली आहे. या कार्यशाळेत बांबूपासून अगरबत्ती तयार करण्याची यंत्रे तसेच बांबू, लाकूड, प्लायवूडवर संगणकीय कोरीवकाम करणारे यंत्र स्थापन करण्यात आले आहे. या कार्यशाळेतून बांबूचे आकाशकंदील, पेले, मोबाईल स्टँड, लॅम्पशेड, पेनस्टँड, फ्लॉवरपॉट तसेच इतर अनेक शोभेच्या हस्तकलाकृती तयार करण्यात येत होत्या. त्या आता अधिक सुबक आणि नक्षीदार होण्यास मदत होणार आहे. तसेच खुर्च्या, टेबल, स्टूल यांचे मोठ्या प्रमाणावर उत्पादन करण्यात येणार आहे.

कुलगुरूंनी विद्यापीठातील सर्व महाविद्यालये, संशोधन केंद्रे तसेच कार्यालयांना त्यांच्या आवश्यकतेच्या वस्तू प्राथमिकतेने या कार्यशाळेतूनच खरेदी करण्याच्या सूचना दिल्या आहेत. वनशास्त्र महाविद्यालयाने अगदी अल्पावधीतच केलेल्या प्रगतीचे त्यांनी कौतुक केले. या कार्यशाळेत विद्यार्थ्यांना कार्यानुभव देऊन त्यांच्यामध्ये उद्योजकता वाढविण्याचा प्रयत्न केला जातो. तसेच शेतकरी, उद्योजक आणि कारागीर यांच्यासाठी विविध प्रकारची प्रशिक्षणे आयोजित करण्यात येतात.माणगा बांबूवरील संशोधनात वनशास्त्र महाविद्यालयाने आघाडी घेतली आहे.