सिंधुदुर्गनगरी : जिल्ह्यात शुक्रवारी सायंकाळी उशिरा वादळी वाऱ्यांसह मुसळधार पाऊस झाला. कणकवली आणि वैभववाडी तालुक्यात मुसळधार पाऊस झाला. वादळी वाऱ्यामुळे अनेक ठिकाणी झाडे रस्त्यावर कोसळली. त्यामुळे वाहतुकीचा खोळंबा झाला.

 गेले दहा-बारा दिवस जिल्ह्यातील काही तालुक्यांत अधूनमधून पाऊस पडत होता. परंतु शुक्रवारी सांयकाळी उशिरा जिल्ह्याच्या बहुतांशी भागात विजांचा कडकडाट आणि वादळी वाऱ्यांसह मुसळधार पावसाला सुरूवात झाली.

कणकवली, वैभववाडी तालुक्यातील काही गावांना पावसाने झोडपून काढले. कुडाळ, देवगड, सावंतवाडी, वेंगुर्ला, दोडामार्ग तालुक्यात देखील पावसाच्या सरी कोसळल्या. पावसासोबत वादळी वारे देखील वाहत होते. या वादळी वाऱ्यामुळे कणकवली शहरात एका ठिकाणी रस्त्यावर झाडे कोसळली त्यामुळे काहीकाळ वाहतुकीचा खोळंबा झाला.

या शिवाय वैभववाडी तालुक्यात अनेक ठिकाणी वीज वाहिन्यांवर झाडांच्या फांद्या कोसळल्याने वीज पुरवठा खंडित झाला. वैभववाडीत तब्बल दीड-दोन तास पाऊस झाला. त्यामुळे शेतमळ्यांमध्ये पाणी साचले होते. कुडाळ तालुक्यातील हुमरमळा, डिगस, अणाव, पणदूर, कडावल, या भागात पावसाच्या जोरदार सरी कोसळल्या.

या पावसामुळे जिल्ह्यातील आंबा पिकांचे मोठे नुकसान झाले आहे. किनारपट्टी तालुक्यातील आंबा हंगाम अंतिम टप्प्यात तर पूर्व पट्ट्यातील आंबा हंगाम नुकताच सुरू झाला आहे. या पट्ट्यातील आंबा पिकाचे मोठे नुकसान पूर्वमोसमी पावसामुळे होत आहे.