सिंधुदुर्ग ः सिंधुदुर्गात गुरूवारी (ता.२) रात्रीपासून मुसळधार पावसाला सुरूवात झाली आहे. रात्रभर पावसाच्या जोरदार सरी कोसळत आहेत. शुक्रवारी (ता.३) पावसाचा जोर किंचीत कमी झाला आहे. मात्र, चांगला पाऊस झाल्यामुळे भातलावणीच्या कामाला वेग आला आहे. शेतकऱ्यांमध्ये देखील समाधानाचे वातावरण आहे.

जिल्ह्यात गेल्या काही दिवसांपासून शेतीला आवश्‍यक पाऊस पडत नव्हता. एक- दोन दिवस संध्याकाळच्या वेळेत पावसाच्या सरी कोसळल्या. परंतु, त्यानंतर पुन्हा पावसाने दडी मारली होती. पावसाअभावी भातरोपे लागवडीची कामे रखडली होती. त्यामुळे शेतकऱ्यांमध्ये देखील चिंतेचे वातावरण होते.

दरम्यान गुरूवारी रात्रीपासून पावसाचा जोर वाढला आहे. सर्व जिल्ह्यात मुसळधार पाऊस सुरू आहे. रात्रभर पावसाच्या सरीवर सरी कोसळत होत्या. त्यामुळे नदी-नाले पूर्ण क्षमतेने वाहू लागले आहेत. रखडलेल्या भातलावणीला शेतकऱ्यांनी सुरूवात केली आहे. शुक्रवारी सकाळी आठ वाजेपर्यत मुसळधार पाऊस सुरू होता. त्यानंतर पावसाचा जोर किंचीत कमी झाला.