सिंधुदुर्ग ः जिल्ह्याच्या काही भागाला सोमवारी (ता. २१) सायंकाळी मुसळधार पावसाने झोडपून काढले. अनेक भागात पूरस्थिती निर्माण झाली. काही भागात पुराचे पाणी साचले असून अनेक मार्गावरील वाहतूक ठप्प झाली आहे. पुराचे पाणी घुसल्यामुळे भातशेतीचे नुकसान झाले आहे.

दरम्यान जिल्ह्यात आज सकाळपासून देखील संततधार सुरूच आहे. वेंगुर्ल्यांत २६४ मिलिमीटर तर मालवणमध्ये २५४ मिलिमीटर  पावसाची नोंद झाली आहे. जिल्ह्यात सोमवारी सकाळी काही भागात पावसाला सुरुवात झाली. सायंकाळी उशिरा त्यामध्ये वाढ झाली.वेंगुर्ला, मालवण, दोडामार्ग, सांवतवाडी या तालुक्यांना मुसळधार पावसाने झोडपून काढले. पावसाच्या सरीवर सरी कोसळत होत्या.त्यामुळे या तालुक्यांमध्ये पूरसदृश स्थिती निर्माण झाली.

सांवतवाडी बाजारपेठेमध्ये पावसाचे पाणी साचून ते काही दुकानांमध्ये घुसले त्यामुळे व्यापाऱ्यांची तारांबळ उडाली. जिल्ह्यात सर्वाधिक पाऊस झालेल्या वेंगुर्ला तालुक्याला पावसाचा मोठा दणका बसला. या तालुक्यातील अनेक मार्गावर पुराचे पाणी आल्याने वाहतूक विस्कळीत झाली. तळवडा-होडावडे हा मुख्य मार्गावरील वाहतूक देखील ठप्प झाली. कुडाळ तालुक्यातील आंबेरी पुलावरून पुराचे पाणी वाहत असल्यामुळे या भागातील २७ गावांचा तालुक्याशी सपंर्क तुटला आहे. आंबोली घाटात दरड कोसळली.

जिल्ह्यात सुरू असलेल्या मुसळधार पावसामुळे दोडामार्ग, सांवतवाडी, वेंगुर्ला, कणकवली या तालुक्यातील भातशेतीत पुराचे पाणी घुसले आहे. अजून एक दोन दिवस पावसाचा जोर कायम राहिल्यास भातशेतीचे मोठे नुकसान होण्याची शक्यता आहे.हळवी भातपिके परिपक्व झाली असून त्या पिकांचे नुकसान अटळ आहे. त्यामुळे शेतकऱ्यांमध्ये चिंतेचे वातावरण आहे. दरम्यान मंगळवारी (ता. २२) पहाटेपासून पुन्हा एकदा मुसळधार पावसाला सुरुवात झाली आहे.