जत, जि. सांगली ः तालुक्‍याच्या पूर्व भागातील ४२ गावांना पाणी देण्यासाठी शासन कटिबद्ध आहे. कर्नाटकाला जादा पाणी सोडण्याची भूमिका घेतली आहे. आठवड्याभरात कर्नाटकचे जलसंपदामंत्री डी. शिवकुमार यांच्याशी बैठक होणार आहे. लवकरच संयुक्त करार करण्यात येईल, अशी माहिती कृष्णा खोरे महामंडळाचे उपाध्यक्ष तथा खासदार संजय पाटील यांनी दिली. डफळापूर (ता. जत) येथील तलावात म्हैसाळ योजनेतून आलेल्या पाण्याचे पूजन खासदार पाटील, आमदार विलासराव जगताप यांच्या हस्ते झाले. 

श्री. पाटील म्हणाले, ‘‘पंतप्रधान नरेंद्र मोदी, केंद्रीय मंत्री नितीन गडकरी यांच्या आश्वासक धोरणामुळे दुष्काळी भागाला वरदान ठरणाऱ्या सिंचन योजना पूर्णत्वाला येत आहेत. दुष्काळी भागाच्या टोकाला पाणी दिल्याशिवाय स्वस्थ बसणार नाही. पश्‍चिम महाराष्ट्रातील योजना अनुशेषामुळे रखडल्या होत्या. मी, आमदार जगताप यांनी मुख्यमंत्र्यांची भेट घेऊन सुधारित प्रशासकीय मान्यता घेतली. त्याला निधी उपलब्ध नव्हता. पंतप्रधान व गडकरी यांची भेट घेऊन निधीची मागणी केली. श्री. मोदींनी योजनेचा पंतप्रधान सिंचन योजनेत समाविष्ट करून दोन हजार कोटींचा निधी दिला.’’

श्री. पाटील म्हणाले, ‘‘जत पूर्व भागातील ४२ गावांना पाणी देण्यासाठी प्रयत्न आहे. कर्नाटक, महाराष्ट्राने संयुक्त करार केल्यास हा प्रश्न सुटू शकतो. आठवड्यात कर्नाटक सरकारसोबत बैठक होईल. कर्नाटकला जादा पाणी सोडण्याची भूमिका घेतली. करार लवकरच होईल.’’ 

श्री. जगताप म्हणाले, ‘‘अनेक वर्षे येथील जनतेला प्रतीक्षा लागली. निवडून आल्यानंतर प्रथम प्राधान्य दिले. दोन महिन्याला आढावा घेतला. योजनेचे काम गतीने झाले. दोन महिन्यांत पूर्ण होईल. अंकले व खलाटी पंप हाउसची चाचणी दोन दिवसांत होणार आहे. बिळूर, देवनाळ परिसरातील पाण्याचा प्रश्न मिटेल. डफळापूर परिसरातील शेतकऱ्यांनी समजूतदारपणा दाखवल्याने येथे लवकर पाणी आले.’’