अकोला ः जिल्ह्यात पानपिंपरी या वनौषधीवर्गीय पिकाचे उत्पादन घेतले जात असून शासनाने या पिकाला पीकविम्यात समाविष्ट करावे, अशी मागणी उत्पादकांनी शासनाकडे करण्यात आली आहे. यापुर्वीही ही मागणी झालेली आलेली असताना शासनाकडून अद्यापपर्यंत कुठलीही धोरणात्मक पावले उचलण्यात आलेली नाहीत.

जिल्ह्यात सातपुड्याच्या पायथ्याशी असलेल्या तेल्हारा, अकोट तसेच शेजारच्या अमरावती जिल्ह्यातील अंजनगावसूर्जी, परतवाडा आदी तालुक्यांत पानपिंपरी या वनौषधीचे उत्पादन घेतले जाते. वर्षानुवर्षे ही शेती होत असताना आजवर कृषी खात्याने या पिकाचा पीकविम्यात समाविष्ट व्हावा यादृष्टीने काहीही केलेले नसल्याची खंत शेतकरी मांडत आहे. दरवर्षी या पिकावर बुरशीजन्य रोग, गारपीट व इतर नैसर्गिक आपत्ती येतात. यात हातातोंडाशी आलेले पीक नामशेष होते. वेलवर्गीय पिकाचे अतोनात नुकसान होत असते.

पानपिंपरीच्या उत्पादनासाठी मोठ्या प्रमाणात लागवड व व्यवस्थापन खर्च शेतकऱ्यांना करावा लागतो. अशातच आपत्ती आली की शेतकऱ्यांना नुकसान झेलावे लागते. दरवर्षी अशा घटनांमध्ये वाढ होत आहे. या आघातांमधून शेतकऱ्यांना दिलासा देण्याच्या उद्देशाने पानपिंपरीचा समावेश पीकविम्यात करावा, अशी मागणी शेतकरी करीत आहेत.

पानपिंपरी पिकाला आजपर्यंत पीकविम्याचे संरक्षण नसल्याने नुकसान झाल्यास मदत मिळत नाही. शासनाने या महत्त्वाच्या पिकाचा पीकविम्यात समावेश करावा. यामुळे उत्पादकाला आधार मिळू शकेल. - गजानन आकोटकर, उत्पादक, पणज ता. अकोट जि. अकोला