अकोला : गोवर आणि रुबेलापासून बालकांचे रक्षण करणाऱ्या लसिकरण मोहिमेचा मंगळवारी (ता.२७) जिल्ह्यात प्रारंभ करण्यात अाला. प्रशिक्षित आरोग्य कर्मचाऱ्यांनी बालकांना लस टोचली. पाच आठवडे चालणाऱ्या या मोहिमेत नऊ महिने ते १५ वर्षे वयोगटातील बालकांना ही लस दिली जाईल.

अकोला येथून या मोहिमेला सुरवात झाली. या वेळी महापौर विजय अग्रवाल, जिल्हा परिषदचे मुख्य कार्यकारी अधिकारी कैलास पगारे, आरोग्य उपसंचालक डॉ. आर. एस. फारुखी, जिल्हा शल्य चिकित्सक डॉ. आरती कुलवाल, जिल्हा आरोग्य अधिकारी डॉ. एम. एम. राठोड, माता बालसंगोपन अधिकारी डॉ. मनीष शर्मा, अतिरिक्त आरोग्य अधिकारी डॉ. विजय जाधव, मनपाचे आरोग्य अधिकारी डॉ. फारुख शेख, लसीकरण क्षेत्रीय अधिकारी डॉ. ठोसर, जिल्हा विस्तार माध्यम अधिकारी प्रकाश गवळी, विद्यालयाच्या मुख्याध्यापिका निता फर्नांडीस उपस्थिती होत्या.

गोवर व रुबेलाचे समूळ उच्चाटन करण्यासाठी शासनाने महत्वाकांक्षी मोहीम शहरी व ग्रामीण भागात सुरू केली आहे. जिल्ह्यातील सुमारे चार लाख २७ हजार ८७२ बालकांना लस देण्याचे उद्दिष्ट आहे. प्रथम सत्रात शालेय स्तरावर लसीकरण होईल. पालकांनी जागरूकपणे बालकांचे लसीकरण करून घ्यावे, असे आवाहन आरोग्य विभागाने केले.