कोल्हापूर  : राज्यातील पशुसंवर्धन विकासाला बळ देण्यासाठी ७०० कोटी रुपयांची वाढीव निधी लवकरच मिळणार आहे. त्यामुळे राज्यातील दुग्धोत्पादनाबरोबरच पशुसंवर्धनाला बळ मिळेल, असे मत पशुसंवर्धन व दुग्धव्यवसायमंत्री महादेव जानकर यांनी व्यक्त केले. 

येथील मध्यवर्ती अंडी उबवणी केंद्रात पशुसंवर्धन संस्थांना आयएसओ प्रमाणपत्रवाटप शनिवारी श्री. जानकर यांच्या हस्ते झाले. या वेळी ते बोलत होते. या वेळी श्री. जानकर म्हणाले, की कोल्हापुरातील मध्यवर्ती आणि अंडी उबवणी केंद्राने अंडी उबवणी तसेच कुक्कुटपालन व्यवसायात आघाडी घेतली असून, या केंद्राचा राज्यात प्रथम क्रमांक आला आहे. यासाठी येथील अधिकारी, कर्मचाऱ्यांनी घेतलेले कष्टही मोलाचे आहेत. भविष्यात या जिल्ह्यात पशुसंवर्धनाचे काम अधिक सक्षमपणे व्हावे, यासाठी मनुष्यबळ वाढविण्याचे प्रयत्न विभागामार्फत सुरू आहेत. त्याचाच भाग म्हणून रिक्तपदे भरण्यासंदर्भात तसेच पदोन्नतीचा प्रश्नही लवकरच मार्गी लावला जाईल .

राज्यातील जनावरांवर आधुनिक तंत्रज्ञानाद्वारे उपचार व्हावेत, तसेच उपचारपूरक सुविधा ग्रामीण दुर्गम भागातील जनावरांपर्यंत पोचाव्यात, पशुसंवर्धन विभागाचे उपक्रम, योजनांचा प्रत्येक पशुपालकाला लाभ मिळावा, यासाठी या विभागाला वाढीव निधी उपलब्ध करून देण्यात येत आहे. त्यामुळे राज्यातील दूध व्यवसाय व पशुसंवर्धन अधिक सक्षम करण्यास मदत होईल, असे श्री. जानकर यांनी सांगितले.