पुणे  ः ‘‘माघी पौर्णिमेला खग्रास चंद्रग्रहण आहे. भारतासह आशिया, अमेरिका, युरोपच्या ईशान्येकडील प्रदेश, ऑस्ट्रेलिया, न्यूझीलंड येथील खगोलप्रेमी नागरिकांना हे ग्रहण पाहता येईल. बुधवारी (ता. ३१) सायंकाळी पाच वाजून १८ मिनिटांनी ग्रहण सुरू होईल. मात्र सूर्यास्तानंतर काही मिनिटांनी ग्रहण लागलेले चंद्रबिंब झाकलेल्या अवस्थेत दिसायला लागेल. संपूर्ण भारतात एक तास १७ मिनिटे हे ग्रहण पाहायला मिळेल,’’अशी माहिती पंचांगकर्ते मोहन दाते यांनी दिली.  भारतात पूर्वांचलाकडील काही प्रदेश वगळता सर्वत्र खग्रास अवस्था पाहायला मिळेल. ग्रहण लागल्यावर सायंकाळी सहा वाजून २१ मिनिटांनी चंद्रबिंब झाकोळलेले दिसू लागेल. सायंकाळी सात वाजून ३८ मिनिटांनी खग्रास अवस्था संपेल तरीही ग्रहण सुरू राहील. रात्री आठ वाजून ४२ मिनिटांनी ग्रहण संपेल. बुधवारी सूर्योदयापासून वेधकाळ सुरू होत असून, ग्रहण संपेपर्यंत वेध पाळावेत. माघ महिन्यातील पौर्णिमेच्या कुलधर्म-कुलाचाराचे धार्मिक कार्यक्रम, पूजन वेधकाळातही करता येतील. त्यामुळे सूर्योदयापासून दुपारपर्यंत (माध्यान्यवेळ) पूजादी विधी करावेत. या दिवशी अनेक गावांमध्ये यात्रा, उत्सव, पालखी मिरवणूक आदी धार्मिक कार्यक्रमही असतात. प्रथेप्रमाणे सायंकाळी पाच वाजेपर्यंत हे कार्यक्रम करावेत, असेही पंचांगकर्ते मोहन दाते यांनी कळविले आहे.