मुंबई : लोकसभा निवडणुकीसाठी भाजपाने शुक्रवारी रात्री उमेदवारांची दुसरी यादी जाहीर केली असून यात ३६ उमेदवारांचा समावेश आहे. यात महाराष्ट्रातील सहा जागांचा समावेश असून जळगावमधून स्मिता वाघ, नांदेडमधून प्रताप चिखलीकर, दिंडोरीतून डॉ. भारती पवार, पुण्यातून गिरीश बापट, बारामतीतून कांचन राहुल कुल आणि सोलापूरमधून डॉ. जयसिद्धेश्वर स्वामी यांना उमेदवारी देण्यात आली आहे. लोकसभा निवडणुकीसाठी भाजपाने गुरुवारी पहिली यादी जाहीर केली होती. पहिल्या यादीत १८४ उमेदवारांचा समावेश होता. तर शुक्रवारी रात्री जाहीर ३६ उमेदवारांची दुसरी यादी जाहीर केली आहे. दुसऱ्या यादीत राज्यातील चार विद्यमान खासदारांचा पत्ता कट करण्यात आला आहे. यात पुण्यातील विद्यमान खासदार अनिल शिरोळे, सोलापूरचे शरद बनसोडे, जळगावचे ए. टी. पाटील आणि दिंडोरीचे हरिश्चंद्र चव्हाण यांचा समावेश आहे. जळगावमध्ये एकनाथ खडसे यांच्याऐवजी भाजपा पक्षश्रेष्ठींनी गिरीश महाजन यांच्या गटातील आमदार स्मिता वाघ यांना उमेदवारी दिली आहे. काँग्रेसनेही आणखी ३५ उमेदवार जाहीर केले आहेत. यात महाराष्ट्रातील पाचजणांचा समावेश आहे. यामध्ये चंद्रपूर- विनायक बांगडे, जालना- विलास औताडे, औरंगाबाद- सुभाष झांबड, भिवंडी- सुरेश टावरे, लातूर- मच्‍छिंद्र कामत यांचा समावेश आहे.