पुणे : राज्यात ४० हजार टन दूध पावडर (भुकटी) पडून आहे. यामुळे खासगी व सहकारी दूध प्रकल्पांमध्ये तयार झालेले पावडरचे साठे ‘ना नफा - ना तोटा’ तत्त्वावर खरेदी करावेत. पावडरचा बफर स्टॉक करण्याची वेळ आली आहे, असे मत इंडियन डेअरी असोसिएशनचे माजी अध्यक्ष अरुण नरके यांनी व्यक्त केली.  ‘कोरोना’च्या स्थितीमुळे दूध आणि दुग्धजन्य पदार्थांना मागणी नसल्याने डेअरी उद्योग आर्थिक संकटात सापडला आहे. यासाठी सहकारी संघांचे रोज दहा लाख लीटर दूध खरेदी करण्याची घोषणा सरकारने केली. प्रत्यक्षात १० लाख लिटरवर ही खरेदी गेलीच नाही; तसेच या खरेदीपोटी मिळालेल्या २०० कोटींच्या निधीतील एक रुपया देखील वाटप केला गेलेला नाही.  श्री. नरके म्हणाले, की दूध पावडरबाबत अशी स्थिती तीन वर्षांपूर्वी देखील आली होती. आत्ताचे चित्र मात्र जास्त भयावह आहे. केंद्र व राज्य सरकारने मतभेद विसरून राज्यातील दूध उत्पादक शेतकऱ्यांना तारण्यासाठी दूध पावडरचे बफर स्टॉक तयार करण्याबाबत तातडीने नियोजन केले पाहिजे. अडवलेले पेमेंट तातडीने अदा केले पाहिजे. राज्यात सध्या ‘कोरोना’मुळे निर्माण झालेल्या अतिरिक्त दुधाच्या समस्येला हाताळण्यासाठी पावडर निर्मिती हाच पर्याय आहे. तथापि, त्यात नियोजन अजिबात नाही. कोल्हापूरच्या गोकुळ संघात १८०० टन पावडर पडून आहे. इतर संघांचे सरकारने खरेदी केलेले दूध देखील ‘गोकुळ’मध्ये येते. त्याची रोज ५० टन पावडर केली जाते. मात्र, अजून सरकारने कोणतेही शुल्क तसेच अनुदान अदा केलेले नाही, असे ‘गोकुळ’चे म्हणणे आहे. शिल्लक दूध पावडरचे चित्र