सांगली  ः जिल्ह्यातील दुष्काळी पट्ट्यातील जत, कवठेमहांकाळ, तासगाव, खानापूर आणि आटपाडी तालुक्यांत दिवसेंदिवस दुष्काळाची दाहकता वाढू लागली आहे. कारखाने सुरू होते, तोपर्यंत विकतच्या वाढ्यावर दिवस काढले. पण आता ते देखील परवडण्यापलीकडे गेले आहे. गेल्या महिन्यात ज्वारीचा कडबा ३ हजार रुपये शेकडा मिळायचा, हाच दर आता चार हजारावर गेला आहे. त्यामुळे दुष्काळाच्या वणव्यात कुटुंब जगवायचं का जनावर, या विवंचनेत शेतकरी आहेत.  दुष्काळी पट्ट्याच उसाचे वाढे हाच जनावरांचा चारा झाला आहे. परंतु जिल्ह्यातील तीन साखर कारखान्याचे गाळप बंद झाले आहे. त्यामुळे शेजारील सोलापूर जिल्ह्यातील अकलूज परिसरातून दिवसाला पाच ते सहा गाड्यांतून दिघंचीत वाड्याची विक्री होत आहे. तो खरेदीसाठी शेतकऱ्यांची झुंबड उडते. परंतु या चाऱ्यासाठी जादा किंमत मोजावी लागते आहे. चारा छावण्या सुरू करण्याची मागणी केली असली, तरी शासन स्तरावर ढिम्म कारभार सुरू आहे. दुष्काळामुळे शेतमजुराच्या हाताला काम नाही. शेतकऱ्यांना उत्पन्न नाही. सध्या मार्च महिना सुरू असून, अजून कडक उन्हाळ्याचे तीन महिने आहेत. ते कसे काढायचे हा मोठा प्रश्‍न शेतकऱ्यांसमोर आहे.  जिल्ह्यातील जत, कवठेमहांकाळ, आटपाडी, खानापूर आणि तासगाव या तालुक्यांसह इतर गावांमध्ये गंभीर स्वरूपाचा दुष्काळ जाहीर करण्यात आला आहे. शासनाकडून तत्काळ उपाययोजना अपेक्षित होत्या. मात्र अद्यापही शासनाकडून ठोस उपाययोजना केल्या गेल्या नाहीत.  ७० हजार किलो बियाण्यांची वैरण किती?  जिल्हा परिषदेच्या पशुसंवर्धन विभागाकडून जिल्हा नियोजन समितीच्या फंडातून ऐन दुष्काळात ७० हजार ४१० किलो इतके मका बियाण्याचे वैरणीसाठी मोफत वाटप करण्यात आले. मात्र त्यापैकी कितीचा चारा झाला? याबाबत मात्र कोणाकडे उत्तर नाही. त्यामुळे हा खर्च वाया गेला की काय, असा प्रश्न उपस्थित केला जाऊ लागला आहे.  सध्याचे वैरणीचे दर 

शासनाने शेतकऱ्याचा अंत पाहू नये. पशुधन वाचवण्यासाठी तातडीने चारा छावण्या सुरू करून शेतकऱ्यांना आधार द्यावा.  - सोमा पाटील,  दिघंजी, ता. आटपाडी